უკრაინის დელეგაცია, რომელსაც პირველი ვიცე-პრემიერი და ეკონომიკის მინისტრი იულია სვირიდენკო ხელმძღვანელობს, სამშაბათს, 3 ივნისს, ვაშინგტონში ჩავიდა.
ამის შესახებ Telegram-ზე უკრაინის პრეზიდენტის ადმინისტრაციის ხელმძღვანელმა ანდრიი ერმაკმა განაცხადა და აღნინშა, რომ დელეგაციაში ასევე შედიან თავდაცვის სამინისტროსა და პრეზიდენტის ადმინისტრაციის წარმომადგენლები.
„ჩვენი დღის წესრიგი საკმაოდ კომპლექსურია. ვგეგმავთ ვისაუბროთ თავდაცვის მხარდაჭერასა და ბრძოლის ველზე არსებულ ვითარებაზე, რუსეთის წინააღმდეგ სანქციების გამკაცრებაზე, კერძოდ, სენატორ ლინდსი გრემის კანონპროექტზე. ასევე განვიხილავთ რესტავრაციის საინვესტიციო ფონდის შექმნის შესახებ შეთანხმებას, რომელიც ადრე იყო ხელმოწერილი“, - ნათქვამია ერმაკის პოსტში.
გარდა ამისა, კიევის წარმომადგენლები აპირებენ ამერიკელ პარტნიორებთან განიხილონ უკრაინიდან უკანონოდ გაყვანილი ბავშვების სამშობლოში დაბრუნების და „რუსების მიერ ეკლესიის საკითხებთან დაკავშირებული პროპაგანდის“ საკითხები.
ერმაკის თქმით, უკრაინული მხარე ასევე აპირებს შეერთებულ შტატებს აცნობოს სტამბოლში რუსეთთან უკრაინაში ომის დასრულების შესაძლებლობასთან დაკავშირებით გამართული მოლაპარაკებების შედეგების შესახებ.
