უკრაინის თავდაცვის მინისტრმა, რუსტემ უმეროვმა, რომელიც ხელმძღვანელობს უკრაინის დელეგაციას რუსეთთან, მოლაპარაკებებში, რუსეთის პრეზიდენტის თანაშემწეს, ვლადიმირ მედინსკის, გადასცა უკრაინის პოზიციის შემცველი დოკუმენტი. ამის შესახებ თავდაცვის მინისტრმა X-ზე დაწერა.
მისი თქმით, 16 მაისს თურქეთში გამართული შეხვედრის შემდეგ, მსოფლიო ელოდა, რომ რუსული მხარე შეიმუშავებდა და უკრაინასა და მის პარტნიორებს გაუგზავნიდა „მემორანდუმს“, რომელშიც აღწერილი იქნებოდა ცეცხლის შეწყვეტისკენ გადადგმული ნაბიჯები.
„სამწუხაროდ, რუსულმა მხარემ სცადა ამ პროცესის გაჭიანურება“, - განაცხადა უმეროვმა.
ამავდროულად, მან აღნიშნა, რომ რუსებზე ზეწოლამ შედეგი გამოიღო.
„პრეზიდენტ ტრამპის, ევროპელი ლიდერების და პრეზიდენტ ზელენსკის მკაცრი განცხადებების შემდეგ, რომლებმაც დაამტკიცეს, რომ მსოფლიო ერთიანია უკრაინისთვის მშვიდობის მიღწევის გარშემო, რუსებმა საბოლოოდ გამოაცხადეს, რომ მათ დაასრულეს თავიანთი „მემორანდუმი“, - თქვა უმეროვმა.
თუმცა, როგორც თავდაცვის მინისტრმა ხაზი გაუსვა, რუსები დოკუმენტის გადაცემას აჭიანურებენ.
„რუსეთის დელეგაციის ხელმძღვანელს გადავეცი ჩვენი დოკუმენტი, რომელიც უკრაინის პოზიციას ასახავს. მათ ეს დოკუმენტი მიიღეს, - აღნიშნა უმეროვმა.
მან ასევე დაადასტურა უკრაინის მზადყოფნა სრული და უპირობო ცეცხლის შეწყვეტისა და დიპლომატიური მუშაობის გაგრძელებისთვის.
„ჩვენ არ ვართ რუსებთან შეხვედრების წინააღმდეგი და ველოდებით მათ „მემორანდუმს“, რათა შეხვედრა ცარიელი არ იყოს და ომის დასრულება ნამდვილად მოააახლოოს. რუსულ მხარეს გამგზავრებამდე კიდევ სულ მცირე ოთხი დღე აქვს, რათა დოკუმენტი დამუშავებისთვის გადმოგვცეს,“ - განაცხადა უმეროვმა.
