აშშ-ის პრეზიდენტის, დონალდ ტრამპის გადაწყვეტილება სირიის წინააღმდეგ სანქციების მოხსნის შესახებ ისტორიული და გაბედული იყო. ამის შესახებ სირიის პრეზიდენტმა, აჰმედ ალ-შარაამ ქვეყნის მოქალაქეებისადმი მიმართვაში განაცხადა
„სანქციების მოხსნის გადაწყვეტილება ისტორიული და გაბედული იყო. დღეს სერიოზული სამუშაო დაიწყო და მასთან ერთად თანამედროვე სირიის აღორძინებაც. ახალმა სირიამ მონაწილეობა მიიღო უმნიშვნელოვანეს საერთაშორისო ფორუმებსა და კონფერენციებში, აღმართა თავისი დროშა გაერო-ში, მოახერხა დახურული კარების გაღება და გზა გაუხსნა სტრატეგიულ ურთიერთობებს არაბულ და დასავლურ ქვეყნებთან,“ - განაცხადა ალ-შარაამ.
ალ-შარაამ კიდევ ერთხელ დაადასტურა, რომ„სირია ვალდებულია გააუმჯობესოს საინვესტიციო კლიმატი, შეიმუშაოს ეკონომიკური კანონმდებლობა და უზრუნველყოს საჭირო პირობები, რაც მას საშუალებას მისცემს წვლილი შეიტანოს რეკონსტრუქციასა და ყოვლისმომცველ განვითარებაში.
„ჩვენ მივესალმებით ყველა ინვესტორს როგორც ქვეყნის შიგნით, ასევე მის ფარგლებს გარეთ, ჩვენს არაბ და თურქ ძმებს, ასევე ჩვენს მეგობრებს მთელ მსოფლიოში და მოვუწოდებთ მათ, ისარგებლონ სხვადასხვა სექტორში არსებული შესაძლებლობებით“, - განაცხადა სირიის პრეზიდენტმა.
შეგახსენებთ, ერ-რიადში დონალდ ტრამპსა და ალ-შარაას შორის მოლაპარაკებები გაიმართა, აშშ-სა და სპარსეთის ყურის თანამშრომლობის საბჭოს სამიტის წინ. ეს აშშ-სა და სირიის პრეზიდენტებს შორის ბოლო 25 წლის განმავლობაში პირველი შეხვედრა იყო.
13 მაისს, ამერიკელმა ლიდერმა, ერ-რიადში საინვესტიციო ფორუმზე გამოსვლისას, განაცხადა, რომ შეერთებულმა შტატებმა სირიის წინააღმდეგ სანქციების მოხსნის გადაწყვეტილება მიიღო.
