ინდოეთის ხელისუფლებამ განაცხადა, რომ პაკისტანში "ტერორისტულ" ინფრასტრუქტურაზე თავდასხმა განახორციელა. ამის შესახებ Reuters-ის ჟურნალისტი იდრის ალი Х-ზე წერს.

ინდოეთის ხელისუფლების განცხადებით, „ოპერაცია სინდურის“ ფარგლებში ქაშმირის რაიონში ტერორისტული დაჯგუფებების თავშეყრის ადგილები- ცხრა ობიექტი რამდენიმე ბალისტიკური და ფრთოსანი რაკეტით დაბომბეს.

„ჩვენი ქმედებები იყო მიზანმიმართული, აწონილ-დაწონილი და არაესკალაციისკენ მიმართული. პაკისტანის არცერთი სამხედრო ობიექტი არ ყოფილა მიზანში ამოღებული“, - განაცხადა ინდოეთის მთავრობამ.

პაკისტანის თავდაცვის სამინისტრომ დაადასტურა, რომ ინდოეთმა ქვეყანაში არსებულ სამიზნეებზე სარაკეტო იერიში მიიტანა.

თვითმხილველების თქმით, ქალაქ მუზაფარაბადში აფეთქებების შემდეგ ელექტროენერგიის მიწოდება შეწყდა.

პაკისტანის არმიის წარმომადგენელმა ტელერადიოკომპანია ARY-ს განუცხადა, რომ ინდოეთმა პაკისტანს სამ ლოკაციაზე სარაკეტო იერიში განახორციელა, რის შემდეგაც პაკისტანი საპასუხო ზომებს მიიღებს.

ინდოეთის არმიამ სოციალურ ქსელ X-ზე გამოაქვეყნა შეტყობინება: „სამართლიანობა აღსრულდა. დიდება ინდოეთს“.

შეგახსენებთ, ინდოეთსა და პაკისტანს შორის ურთიერთობები მკვეთრად გაუარესდა მას შემდეგ, რაც 22 აპრილს პოპულარულ ტურისტულ ქალაქ პაჰალგამში შეიარაღებულმა პირებმა ტურისტებს ცეცხლი გაუხსნეს.

დაიღუპა 25 ინდოელი და ერთი ნეპალელი, ბევრი კი დაშავდა. თავდამსხმელებმა გაქცევა მოახერხეს.

ინდური მხარის მტკიცებით, ტერაქტის უკან ორგანიზაცია ქაშმირის წინააღმდეგობის მოძრაობა დგას. სამართალდამცავები 2 ეჭვმიტანილს ეძებენ. მასშტაბური ანტიტერორისტული ოპერაციის ფარგლებში გაიჩხირა 1000-მდე სახლი და დაიკითხა 500-მდე ადამიანი.