უკრაინის ევროპული და ევროატლანტიკური ინტეგრაციის საკითხებში ვიცე-პრემიერი ოლგა სტეფანიშინა მიიჩნევს, რომ უნგრეთთან 12 მაისს დაგეგმილი მოლაპარაკებების ახალი რაუნდი აჩვენებს, რამდენად შესაძლებელიაშემდგომი კომპრომისი მათი მხრიდან უკრაინის ევროკავშირში გაწევრიანებაზე მოლაპარაკების გახსნასთან დაკავშირებით,
უკრაინის ხელმძღვანელობას ევროკომისიასთან ერთად 2025 წელს გაწევრიანების მოლაპარაკებების ტემპთან დაკავშირებით ამბიციური გეგმები ჰქონდათ, თუმცა უნგრეთის ვეტომ ხელი შეუშალა.
29 აპრილს უკრაინის წარმომადგენლები ბუდაპეშტში მოლაპარაკებებისთვის ჩავიდნენ, რათა უნგრეთის წინააღმდეგობების მოხსნაზე შეთანხმებისთვის მიეღწიათ.
სტეფანიშინას თქმით, კიევმა წარადგინა წინადადებები უმცირესობების უფლებების სფეროში უნგრეთის მოთხოვნების შესასრულებლად.
წინადადებები, სხვა საკითხებთან ერთად, ეხებოდა საგანმანათლებლო ბლოკს, მიღებული კანონმდებლობის განხორციელებას, პროფესიული განათლების შესახებ კანონპროექტის განხილვას და უნგრეთის ეროვნული უმცირესობის კულტურული უფლებების განხორციელების შესახებ კანონმდებლობას.
„შემიძლია დავადასტურო, რომ 12 მაისს უჟგოროდში უკრაინისა და უნგრეთის დელეგაციებს შორის მოლაპარაკებები 11 პუნქტის საფუძველზე გაიმართება. ამ მოლაპარაკებების შედეგების საფუძველზე, დანამდვილებით შევძლებ ვთქვა, შესაძლებელია თუ არა უნგრეთთან შემდგომი დიალოგი, თუ ეს იმიტაციაა“, - ხაზგასმით აღნიშნა ვიცე-პრემიერმა.
მან ასევე პირობა დადო, რომ უკრაინა ყველაფერს გააკეთებს უნგრეთის ვეტოს მოსახსნელად.
როგორც ცნობილია, 29 აპრილს ბუდაპეშტში გამართული მოლაპარაკებების შემდეგ, უკრაინა და უნგრეთი შეთანხმდნენ რეგულარულ კონსულტაციებზე, რათა უკრაინის ევროკავშირში გაწევრიანების შესახებ მოლაპარაკებები განბლოკონ.
