25-27 იანვარს თბილისში, ბაქო-თბილისი-ყარსის სარკინიგზო მაგისტრალის მშენებლობასთან დაკავშირებით, საქართველოს, თურქეთისა და აზერბაიჯანის წარმომადგენელთა სამმხრივი შეხვედრა გაიმართება.
როგორც დღეს საგარეო საქმეთა მინისტრის მოადგილემ ნინო კალანდაძემ განაცხადა, აღნიშნულ შეხვედრაზე დაზუსტდება ის ტექნიკური და ფინანსური საკითხები, რომლითაც პროექტის შემდგომი განვითარებისათვისაა საჭირო.
შეხვედრაზე მხარეებს შესაბამისი დარგობრივი უწყებების ხელმძღვანელები და მინისტრები წარადგენენ.
შეხვედრაზე ქართულ მხარეს რეგიონალური განვითარებისა და ინფრასტრუქტურის მინისტრი რამაზ ნიკოლაიშვილი წარმოადგენს.
შეხვედრას დაესწრებიან, ასევე, საგარეო საქმეთა და ფინანსთა სამინისტროების წარმომადგენლებიც.
ნინო კალანდაძის შეფასებით, ქართული მხარე ამ პროექტს იმედიანად უყურებს.
საგარეო საქმეთა მინისტრის მოადგილე აცხადებს, რომ აღნიშული პროექტის განხორციელების შემდეგ, ერთის მხრივ, აზია-ევროპის კონტინენტების დაკავშირება მოხდება, ხოლო მეორეს მხრივ პროქტის განხორციელება გარკვეულ ქვეყნებს ეკონომიკურ განვითარებაში დაეხმარება.
"იმედია ბაქო-თბილისი-ყარსის სარკინიგზო მაგისტრალის პროექტი სწრაფად და პოზიტიურად განხორციელდება"- აღნიშნა ნინო კალანდაძემ.
გავრცელებული ინფორმაციით, მიმდინარე საკითხებთან ერთად შეხვედრაზე განიხილება ასევე ბაქო-თბილისი-ყარსის სარკინიგზო მაგისტრალის საქართველოს მონაკვეთის მშენებლობისათვის დამატებითი დაფინანსების გამოყოფის საკითხი.
შეგახსენებთ, რომ სამთავრობო დონეზე უკვე გავრცელებულია ინფორმაცია იმის შესახებ, რომ აზერბაიჯანი მზადაა საქართველოს დამატებით 50 მლნ. დოლარი გამოუყოს, მაშინ როდესაც აზერბაიჯანმა მაგისტრალის ქართული მონაკვეთის მშენებლობისათვის 200 მლნ. დოლარი უკვე გამოყო.
ბაქო-თბილისი-ყარსის პროექტის ფარგლებში 105 კმ. ახალი სარკინიგზო მაგისტრალის მშენებლობა იგეგმება, საიდანაც 76 კმ. თურქეთზე, ხოლო 29 კმ. საქართველოზე გაივლის. პარალელურად რეკონსტრუქცია უტარდება ახალქალაქი-მარაბდა-თბილისის სარკინიგზო მონაკვეთს, რითაც მისი ტვირთბრუნვა წელიწადში 15 მლნ. ტონამდე გაიზრდება.