საქართველოს ეროვნული ბანკი ინფლაციის წინააღმდეგ ბრძოლისთვის მონეტარულ ინსტრუმენტებს გეგმაზომიერად აამოქმედებს, ისე რომ ინფლაცია ერთციფრა ნიშნულზე შენარჩუნდეს და ეკონომიკური ზრდის მაჩვენებელი 5%-ზე დაბლა არ ჩამოვიდეს.

სებ-ის პრეზიდენტმა გიორგი ქადაგიძემ ექსპერტებთან გამართული შეხვედრის შემდეგ განაცხადა, რომ სებ-ი ინფლაციური წნეხის შესაკავებლად მის ხელთ არსებულ ყველა ბერკეტს აამოქმედებს, თუმცა აღნიშნა, რომ სახელმწიფო სტრუქტურა შეზღუდულია, რადგან ინფლაციის გამომწვევი ფაქტორების 90% გარე შოკებია. ინფლაციას უდიდესწილად საერთაშორისო ბაზარზე ძირითადი მოხმარების სასურსათო პროდუქტების გაძვირება განაპირობებს.

მისი განცხადებით, ამაზე ზრუნვა სებ-მა 6 თვის წინათ დაიწყო - გაზარდა მონეტარული პოლიტიკის განაკვეთი და სადეპოზიტო სერტიფიკატებით ჭარბი ფულის ამოღება, გაამკაცრა სარეზერვო და პრუდენციული მოთხოვნები (გაიზარდა ლიკვიდობის და კაპიტალის ადეკვატურობის კოეფიციენტები).

20 იანვრიდან უცხოური ვალუტით მოზიდულ სახსრებზე სარეზერვო ნორმა 5%-იდან 10%-მდე გაიზარდა, 17 თებერვლიდან კი 15%-მდე მოიმატებს.