თბილისში პირველი კლინიკური საავადმყოფოს (ე. წ. არამიანცის) კომპლექსში შემავალი "გინეკოლოგიური კლინიკის" მფლობელი უცხოელი ფიზიკური პირი, დანიელ გუფთა გახდა.
ინვესტორმა "გინეკოლოგიური კლინიკა" 720 000 ლარად შეიძინა. მან ვალდებულება აიღო, რომ კლინიკას 7 წლის განმავლობაში სამედიცინო პროფილს შეუნარჩუნებს.
შპს "თბილისის გინეკოლოგიური კლინიკის" სახელმწიფო საკუთრებაში არსებული 100%-იანი წილის საწყისი ღირებულება 350 ათასი ლარი იყო. დღეისათვის "თბილისის გინეკოლოგიური კლინიკის" საწესდებო კაპიტალი 234379.00 ლარს შეადგენს. კლინიკას 22932.00 ლარის დებიტორული და 29614.00 ლარის კრედიტორული დავალიანება აქვს.
"დღევანდელი აუქციონი მეექვსეა წლის დასაწყისიდან დღემდე და ყოველი მათგანი გამოირჩეოდა მყიდველთა დიდი აქტიურობით. საპრივატიზებო აუქციონის გამართვის ასეთი სიხშირე გამოიწვია პოტენციურ მყიდველთა ინტერესის ზრდამ, რაც, ერთი მხრივ, არის შედეგი ეკონომიკისა და მდგრადი განვითარების სამინისტროს მიერ პრივატიზების სფეროში გატარებული სწორი პოლიტიკის და გადაწტყვეტილებების მიღების პროცესის სრული გამჭვირვალობის, ხოლო მეორე მხრივ, ამის მიზეზია უძრავი ქონების ბაზრის საგრძნობი გააქტიურება", - განაცხადა ეკონომიკისა და მდგრადი განვითარების სამინისტროს პრესსპიკერმა გიორგი კალანდაძემ.
კალანდაძის განმარტებით, 25 იანვარს დაგეგმილია საავადმყოფოს ტერიტორიაზე არსებული კიდევ სამი კლინიკის აუქციონის წესით გაყიდვა. აღნიშნული საავადმყოფოებია: "თვალის სნეულებათა კლინიკა მზერა" _ საწყისი ფასით 380 ათასი ლარით, "ძმები ზუბალაშვიულების სახელობის პედიატრიული კლინიკა" _ საწყისი ფასით 340 ათასი ლარით და "ზოგადი თერაპიის კლინიკა" _ საწყისი ფასით 170 ათასი ლარით.
ეკონომიკისა და მდგრადი განვითარების სამინისტროში განმარტავენ, რომ ამ ეტაპზე პრივატიზება არ შეეხება ე. წ. არამიანცის კომპლექსის ტერიტორიაზე განლაგებულ იმ შენობებს, სადაც დევნილები არიან განთავსებულნი.
