კერძოდ, სიაში მოხვედრილი მეწარმეები, არასამუშაო პერიოდში, შემოსავლების სამსახურის მიერ გაწეული მომსახურეობისთვის, გაორმაგებული საფასურის გადახდის ვალდებულებისაგან თავისუფლდებიან.

2010 წლის მარტში მთავრობის მიერ გამოცემული „შემოსავლების სამსახურის მიერ მომსახურების გაწევისათვის საფასურებისა და მათი განაკვეთების დამტკიცების შესახებ" დადგენილების მიხედვით, არასამუშაო დროს საქონლის გაფორმების მომსახურებით სარგებლობისას დაწესებული ტარიფები გაორმაგდა.

შეგახსენებთ, რომ გაფორმების ეკონომიკურ ზონაში არასამუშაო დროა ორშაბათიდან პარასკევის ჩათვლით 18 საათის შემდეგი პერიოდი, შაბათს _ 15 საათის შემდეგი პერიოდი, კვირა და უქმე დღეები; გაფორმების სხვა ადგილებში _ ორშაბათიდან პარასკევის ჩათვლით 19 საათის შემდეგი პერიოდი, შაბათი, კვირა და უქმე დღეები.

„ოქროს სიაში" მონაწილის სტატუსის პირობები მთავრობამ გასულ წელს გაამარტივა, რომლის მიხედვითაც: პროგრამაში მონაწილეობის მსურველებს სავალდებულო 10 მლნ ლარის დეკლარირებული საქონლის საბაჟო ღირებულების მაჩვენებელი 5 მლნ ლარამდე შეუმცირდათ. წლიური იმპორტის გადასახადი, რომელიც მანამდე 1,8 მლნ ლარს შეადგენდა, შემცირდა 900 000 ლარამდე. არააქციზურ საქონელზე საბაჟო ვალდებულების უზრუნველყოფის საერთო გარანტია 100 000 ევროს ოდენობით - განულდა, აქციზურ საქონელზე საბაჟო ვალდებულების უზრუნველყოფის საერთო გარანტი 500 000 ევრო, შემცირდა 100 000 ლარამდე.

„ოქროს სიაში"ამ დროისათვის 220 კომპანიაა. სიაში მოხვედრა კომპანიებს გამარტივებული საბაჟო პროცედურებით სარგებლობის შესაძლებლობას აძლევს.

კერძოდ, სიაში მოხვედრილებს საქონლის წინასწარი ელექტრონული დეკლარირება თანხმლები დოკუმენტაციის გარეშე შეუძლიათ, ამასთანავე, მათ საშუალება ეძლევათ შემოტანილი ტვირთი საბაჟო საწყობის ნაცვლად, საკუთარ საწყობში განათავსონ და დეკლარაციით განსაზღვრული გადასახადი 30 სამუშაო დღეში გადაიხადონ.