"ეს იყო ათასწლეულის გამოწვევის კორპორაციის დირექტორთა საბჭოს პირველი სხდომა მას შემდეგ, რაც პრეზიდენტმა ობამამ სექტემბერში გააკეთა განცხადება აშშ-ის გლობალური განვითარების პოლიტიკის შესახებ. კორპორაციის მიდგომა განვითარებისადმი, რომელიც ყურადღებას ამახვილებს ეკონომიკის განვითარებაზე, ქვეყნის თანამონაწილეობაზე ამ პროცესში, მდგრადობაზე და ანგარიშვალდებულებაზე, უშუალოდ ეხმიანება პრეზიდენტის სტრატეგიას", _ განაცხადა კორპორაციის აღმასრულებელმა დირექტორმა დენიელ იოჰანესმა.

"საბჭოს დისკუსიის მიმართულების ჩამოყალიბებას ხელი შეუწყო პრეზიდენტ ობამას ახალმა პოლიტიკამ და თავად ათასწლეულის გამოწვევის კორპორაციის სტრატეგიულმა პრიორიტეტებმა, რომლებიც გასული წლის დასაწყისში გამოცხადდა საჯაროდ. ეს პრიორიტეტებია აქცენტი შედეგებზე, კერძო სექტორის მონაწილეობა, გენდერული ინტეგრაცია და ქმედითი რეფორმა პოლიტიკის სფეროში", - განმარტა იოჰანესმა.

სხდომაზე საბჭომ შეარჩია განა და საქართველო, როგორც ქვეყნები, რომლებსაც მიეცემათ უფლება, მოამზადონ წინადადებები ახალ კომპაქტებთან დაკავშირებით. მეორე კომპაქტის გაფორმება დამოკიდებულია პირველი კომპაქტის წარმატებით დასრულებაზე, სწორ სტრატეგიულ მიმართულებებზე, ისეთი წინადადებების შემუშავებაზე, რომელთაც აქვთ ეკონომიკური ზრდისა და სიღარიბის დაძლევის ხელშეწყობის მნიშვნელოვანი პოტენციალი და დაფინანსების შესაძლებლობა.

დირექტორთა საბჭომ განიხილა, აგრეთვე, ჰონდურასის კომპაქტთან დაკავშირებული დადებითი დასკვნა და აღნიშნა, რომ აღნიშნული გამოცდილება კომპაქტის განხორციელების პროცესში წარმოადგენდა პარტნიორული ურთიერთობის ისეთ მაგალითს, რომელიც ათასწლეულის გამოწვევის კორპორაციისათვის არის მისაღები. ბატონმა იოჰანესმა აღნიშნა, რომ "ათასწლეულის გამოწვევის კორპორაცია აფასებს ჰონდურასის მთავრობის მიერ გადადგმულ პოზიტიურ ნაბიჯებს, აგრეთვე მის ერთგულებას რეფორმებისა და წინა კომპაქტის პირობების შესრულების მიმართ. ჩვენ სიამოვნებით ველით ჰონდურასის მთავრობასთან ურთიერთობის გაგრძელებას და განვიხილავთ ქვეყანას მეორე კომპაქტის პერსპექტივაში". დირექტორთა საბჭო შეთანხმდა, რომ კაპე ვერდეს, ინდონეზიას და ზამბიას უფლება ეძლევათ, გააგრძელონ კომპაქტების შემუშავების პროცესი 2011 ფისკალური წლის განმავლობაში.

გარდა იმისა, რომ დირექტორთა საბჭომ დაამტკიცა მალავის უფლება, მიიღოს 2011 ფისკალური წლის დაფინანსება, მან ამ ქვეყანის მთავრობის დაუმტკიცა 350.7 მილიონი აშშ დოლარის კომპაქტი ენერგოსექტორის რეფორმის ჩასატარებლად და ენერგომომარაგების ხელმისაწვდომობის, საიმედოობის და ხარისხის უზრუნველსაყოფად ძირითადი საგენერაციო, გადამცემი და გამანაწილებელი აქტივების რეაბილიტაციის გზით.

"ათასწლეულის გამოწვევის კორპორაცია სიამოვნებით ელის მუშაობის გაგრძელებას მალავისთან კომპაქტის პროგრამის განხორციელების მიზნით", - აღნიშნა კორპორაციის აღმასრულებელმა დირექტორმა დენიელ იოჰანესმა.

მისი განცხადებით, პროგრამის წარმატება დამოკიდებული იქნება მალავის მთავრობის განუხრელ კურსზე გონივრული მმართველობის, ანგარიშვალდებულებისა და გამჭვირვალობის მიმართულებით.

ათასწლეულის გამოწვევის კორპორაცია და მალავის მთავრობა ვარაუდობენ, რომ კომპაქტის ხუთწლიანი პერიოდის განმავლობაში და მის შემდეგ დაახლოებით 6 მილიონი ადამიანი გახდება კომპაქტის ბენეფიციარი. წესდების მიხედვით, ათასწლეულის გამოწვევის კორპორაციის დირექტორთა საბჭოს მიერ დამტკიცებას მოსდევს 15-დღიანი პერიოდი კონგრესისთვის შეტყობინების გასაგზავნად და მხოლოდ ამის შემდეგ შეიძლება მოეწეროს ხელი კომპაქტს.