გერმანიის ელჩი პეტერ ფიშერი საქართველოს "გადაუდებელი საქმის" გამო ტოვებს და გერმანიაში გაემგზავრება. ინფორმაციას On.ge ავრცელებს.
როგორც გამოცემა იუწყება, მათთვის აღნიშნული ინფორმაცია ცნობილი გახდა მას შემდეგ, რაც ორგანიზაცია მწვანე ალტერნატივამ საელჩოსგან მიიღო წერილი, რომელშიც აღნიშნულია, რომ გერმანიის ელჩი ვერ დაესწრება მათ ღონისძიებას 18 აპრილს.
წერილში, მიზეზად დასახელებულია "გადაუდებელი საკითხის გამო" ელჩის "სასწრაფოდ" გერმანიაში გამგზავრება.
დეტალები: როგორც ორგანიზაცია მწვანე ალტერნატივის წარმომადგენლის, მანანა ქოჩალაძის თქმით, თავდაპირველად ელჩისგან მიიღეს თანხმობა ღონისძიებაზე 18 აპრილს დასწრების შესახებ.
"ელჩი სიამოვნებით დაგვთანხმდა, ის აქტიურად თანამშრომლობს სამოქალაქო საზოგადოებასთან. გერმანიის მთავრობა ცდილობს განახორციელოს ღონისძიებები, რომელიც შეამცირებს კლიმატის ცვლილების გავლენას მოწყვლად ქვეყნებში და მათ შორის - საქართველოში", თქვა ქოჩლაძემ.
მისივე თქმით, გერმანიის საელჩოსგან მიღებულ წერილში აღნიშნულია, რომ ღონისძიებაზე ვერც ელჩის მოადგილეები მივლენ, რადგან "ისინი ან არ იქნებიან ქვეყანაში, ან დაკავებული იქნებიან სხვა საქმეებით".
