ოპოზიციონერმა დეპუტატებმა საპარლამენტო უმრავლესობას „უცხოური გავლენის გამჭვირვალობის“ შესახებ კანონპროექტის გაწვევისკენ, მოქალაქეებს კი კანონპროექტის გაპროტესტებისკენ მოუწოდეს. ამასთან დაკავსირებით, საპარლამენტო ოპოზიციის წარმომადგენლებმა, არმაზ ახვლედიანმა, თინა ბოკუჩავამ, ანა ნაცვლიშვილმა, თაკო ჩარკვიანმა, რომან გოცირიძემ, პაატა მანჯგალაძემ, ნატო ჩხეიძემ და თამარ კორძაიამ ერთობლივი ბრიფინგი გამართეს.
„მზად ვართ, ჩვენს თავისუფლებისმოყვარე ხალხთან ერთად, დავიცვათ საქართველოს კონსტიტუცია, საქართველოს ევროპული არჩევანი და არ მივცეთ უფლება კრემლის მიერ შეკვეთილი სცენარით საქართველოში არეულობას. მოვითხოვთ, დაუყოვნებლივ იქნეს გაწვეული რუსული კანონი და საქართველოს პოლიტიკური სპექტრი დაუბრუნდეს ნორმალური წინასაარჩევნო გარემოს ჩამოყალიბებას, ცხრაპუნქტიანი გეგმის შესრულებას და საქართველოში დემოკრატიული არჩევნების გზით ნორმალური, ევროპული მმართველობის ჩამოყალიბებას“, – განაცხადა არმაზ ახვლედიანმა.
ამასთან, როგორც „ლელოს“ წევრმა, ანა ნაცვლიშვილმა აღნიშნა, დღეს პარლამენტთან საქართველოს მოქალაქეების მისვლა მნიშვნელოვანია.
„მინდა, მივმართო საქართველოს თითოეულ მოქალაქეს, თანამოქალაქენო, „ქართული ოცნება“, კრემლის დავალებით, აპირებს, მოიპაროს თქვენი დიდი წარმატება. გასული წლის მარტში ჩვენ, მთელმა საზოგადოებამ ერთობით შევაჩერეთ რუსული კანონი და ამით დავიცავით საქართველოს კანდიდატის სტატუსი, საქართველოს ევროპული გზა. „ქართული ოცნება“ აპირებს, მოიპაროს ეს გამარჯვება, დაგცინოთ ყველას, ჩახერგოს საქართველოს ევროპული მომავალი. ეს არის კონსტიტუციური გადატრიალება. დღეს „ქართულ ოცნებას“ არ ჰყოფნის ხმები, რომ შეცვალოს კონსტიტუციური ჩანაწერი, რომელიც მკაფიოდ ამბობს, რომ საქართველოს მომავალი არის ევროპულ და ევროატლანტიკურ სივრცეში. ამიტომ მას შემოაქვს რუსული კანონი, რათა გვერდი აუაროს კონსტიტუციას, ასე მალულად, ფარულად შემოუაროს გვერდი კონსტიტუციას და შეცვალოს ამ ქვეყნის კონსტიტუციური გარანტი, შეცვალოს თქვენი არჩევანი, ნება. ეს ქვეყანა არ ეკუთვნის ერთ მუჭა, კორუმპირებულ და რუსეთზე მიყიდულ ჩინოვნიკებს, ეს ქვეყანა გეკუთვნით თქვენ, ეს ქვეყანა ეკუთვნის ამ ქვეყნის მომავალ თაობას, რომელსაც არაფერი დაუშავებია და რომელიც იმსახურებს ღირსეულ მომავალს. ამიტომ, გთხოვთ და მოგიწოდებთ, მოდით დღეს პარლამენტთან. აქ ჩვენ ვიქნებით თქვენი ხმა, ჩვენ გავაჟღერებთ ქართველი ხალხის ნებას და ძალიან მნიშვნელოვანია, თქვენ იყოთ საქართველოს პარლამენტთან. ვინაიდან ხელისუფლება ჯიუტად არ ისმენს თქვენს ხმას, ძალიან ხმამაღლა, მკაფიოდ კიდევ ერთხელ გააგონეთ ხელისუფლებას თქვენი ხმა – არა რუსეთს, არა რუსულ კანონს, კი ევროპას“, – განაცხადა ანა ნაცვლიშვილმა.
