უკრაინის პრეზიდენტმა ვოლოდიმირ ზელენსკიმ განაცხადა, რომ ეროვნული უსაფრთხოებისა და თავდაცვის საბჭოს ყოფილი მდივანი ოლექსი დანილოვი მოლდოვაში ელჩის თანამდებობაზე დანიშნა. ამის შესახენ მან ვიდეომიმართვისას განაცხადა.
მიმართვაში ზელენსკიმ გაიმეორა, რომ ყოფილი მდივანი „გააგრძელებს მუშაობას დიპლომატიური მიმართულებით“.
„უფრო კონკრეტულად, მე დავამტკიცე მისი {დანილოვის} კანდიდატურა მოლდოვის რესპუბლიკაში ჩვენი ქვეყნის ელჩის თანამდებობაზე. ის მეუბნებოდა, რომ ზუსტად ასეთი ხედვა ჰქონდა უკრაინაში თავისი სამომავლო საქმიანობის შესახებ“, - დასძინა ზელენსკიმ.
ზელენსკიმ აღნიშნა, რომ მოლდოვა უკრაინისთვის უაღრესად მნიშვნელოვანი სახელმწიფოა უსაფრთხოების გამოწვევებისა და ორმხრივი თანამშრომლობის თვალსზრისით.
შეგახსენებთ, 26 მარტს ზელენსკიმ ოლექსი დანილოვი გაათავისუფლა ეროვნული უსაფრთხოებისა და თავდაცვის საბჭოს მდივნის თანამდებობიდან და მის ნაცვლად დანიშნა ოლექსანდრ ლიტვინენკო, რომელიც მანამდე საგარეო დაზვერვის სამსახურს ხელმძღვანელობდა.
