ნატო-ს შტაბბინასთან შვედეთის დროშის აღმართვის ცერემონიალი გაიმართა.
ბრიუსელში გამართულ ცერემონიალს ნატო-ს გენერალური მდივანი იენს სტოლტენბერგი და შვედეთის პრემიერი-მინისტრი ულფ კრისტერსონი ესწრებოდნენ.
"200 წელზე მეტი ნეიტრალიტეტის შემდეგ, თქვენ უერთდებით ისტორიაში ყველაზე ძლიერ და წარმატებულ სამხედრო ალიანსს. ასე რომ, კეთილი იყოს თქვენი მობრძანება ნატოში, მოხარული ვართ, რომ აქ გნახავთ", - განაცხადა სტოლტენბერგმა ცერემონიის დროს.
მისი თქმით, ნატო დღეს უფრო დიდი და ძლიერია, ვიდრე ორი წლის წინ, რუსეთის მიერ უკრაინაში ომის დაწყებამდე იყო. ამასთან, როგორც სტოლტენბერგმა აღნიშნა, უკრაინაში ომის დასრულება რუსეთს შეუძლია და არა უკრაინას.
„პრეზიდენტმა პუტინმა ორი წლის წინ უკრაინაში სრულმასშტაბიანი შეჭრა როცა დაიწყო, მას სურდა ნაკლები ნატო და მეტი კონტროლი თავის მეზობლებზე. მას სურდა უკრაინის სუვერენული სახელმწიფოს განადგურება, მაგრამ ეს ვერ შეძლო. ნატო უფრო დიდი და ძლიერია, ხოლო უკრაინა ნატო-ს წევრობასთან იმაზე მეტადაა ახლოს, ვიდრე ოდესმე ყოფილა. მაშინ, როდესაც მამაცი უკრაინელები აგრძელებენ ბრძოლას თავისუფლებისთვის, ჩვენ მათ გვერდით ვდგავართ. პუტინმა დაიწყო ეს ომი და მას შეუძლია მისი დასრულება. უკრაინას ეს შესაძლებლობა არ აქვს. დანებება არ არის მშვიდობა. ჩვენ უნდა გავაგრძელოთ უკრაინის გაძლიერება, რათა ვაჩვენოთ პრეზიდენტ პუტინს, რომ ის ბრძოლის ველზე სასურველ შედეგს ვერ მიიღებს და დაჯდეს მოსალაპარაკებლად იმგვარ გამოსავალზე, როდესაც უკრაინა აღიარებულია და დარჩება სუვერენულ, დამოუკიდებელ სახელმწიფოდ“, – განაცხადა ნატო-ს გენერალურმა მდივანმა.
თავის მხრივ, კრისტერსონმა თქვა, რომ "შვედეთი სახლში დაბრუნდა".
"შვედეთი ახლა ნატოს ნაწილია - ამაყი წევრი და მოკავშირე, ჩვენს უახლოეს მეგობრებთან და პარტნიორებთან ერთად. ჩვენ თავმდაბლები ვართ, მაგრამ ამავე დროს ვამაყობთ. ვიცით, რომ მოლოდინი დიდია შვედეთისგან. ჩვენც დიდი მოლოდინი გვაქვს საკუთარი თავისგან." - აღნიშნა მან. .
შვედეთი ჩრდილოატლანტიკური ალიანსის 32-ე წევრი ოფიციალურად 7 მარტს გახდა.
