რუსეთი არ აპირებს უკრაინის პრეზიდენტის ვოლოდიმორ ზელენსკის ლიკვიდაციას, ამის შესახებ გაეროში რუსეთის ფედერაციის მუდმივი წარმომადგენლის მოადგილემ დმიტრი პოლიანსკიმ განაცხადა.
„როგორ ფიქრობთ, ჩვენ რომ გვდომებოდა ზელენსკის ავტოკოლონაზე დარტყმა, ამას ვერ შევძლებდით? და თუ რომელიმე თქვენგანი იმედოვნებს, რომ ამ გზით მოიშორებს კიევის რეჟიმის ლიდერს, მაშინ შემიძლია იმედი გაგიცრუოთ: ეს არ არის ჩვენი გეგმების ნაწილი“, - თქვა პოლიანსკიმ.
მისი თქმით, რუსეთის არმიამ ოდესას ნამდვილად დაარტყა 6 მარტს, მაგრამ მისი თქმით, სამიზნე იყო საზღვაო უპილოტო საფრენი აპარატების საწარმო. პოლიანსკიმ განაცხადა, რომ აღნიშნული სამიზნე უკრაინის პრეზიდენტზე უფრო მნიშვნელოვანი იყო.
როგორც CNN იუწყებოდა, რუსული რაკეტა 500 მეტრში აფეთქდა იმ ავტოკოლონიდან, რომელშიც ზელენსკი და საბერძნეთის პრემიერ-მინისტრი კირიაკოს მიცოტაკისი იმყოფებოდნენ. უკრაინის საზღვაო ძალების სპიკერის, დმიტრო პლეტენჩუკის განცხადებით, თავდასხმის შედეგად ხუთი ადამიანი დაიღუპა და ამდენივე დაშავდა, ზელენსკი და მიცოტაკისი არ დაშავებულან. ოდესაში გამართულ ერთობლივ პრესკონფერენციაზე ზელენსკიმ განაცხადა, რომ კიევმა და ათენმა უსაფრთხოების ორმხრივი შეთანხმების მომზადება დაიწყეს.
