ყაზახეთმა, შესაძლოა, უკრაინას სამხედრო დახმარება გაუწიოს. ამის შესახებ იუწყება რუსული სააგენტო „რია ნოვოსტი“ ინფორმირებულ წყაროზე დაყრდნობით.
სააგენტოს წყაროს თქმით, ყაზახეთში სამხედრო პრიდუქციის შესყიდვის შესახებ უკრაინის სახელმწიფო კომპანია „უკრსპეცეკსპორტმა“ მოლაპარაკებები დაიწყო. უკრაინამ, შესაძლოა, მიიღოს რუსული კომპონენტები პარაშუტის სამუხრუჭე სისტემებისთვის სუ-24 და მიგ-29 ტიპის თვითმფრინავებისთვის. მიწოდებაში შესაძლოა, ჩაერთონ ასტანაში რეგისტრირებული კომპანიები.
წყაროსვე თქმით, შესაძლოა, ყაზახეთის ხელმძღვანელობას აქვს ფარული სვლები მრავალვექტორიანი პოლიტიკის თამაშში „რათა თანაბარი პოზიცია შეინარჩუნოს უკრაინის ირგვლივ არსებულ ვითარებასთან დაკავშირებით, როგორც დასავლეთთან, ასევე ყაზახეთის უსაფრთხოების მთავარ გარანტთან - რუსეთთან დიალოგში“, - ამბობს სააგენტოს წყარო. მისივე თქმით, ამგვარმა დახმარებამ შესაძლოა, ძირი გამოუთხაროს ეკონომიკურ თანამშრომლობას მოსკოვსა და ასტანას შორის.
მანამდე ყაზახეთი უკრაინას სამხედრო დახმარებას არ უწევდა. ასტანამ კიევში მხოლოდ მედიკამენტები, საკვები და სხვა ჰუმანიტარული დახმარება გაგზავნა. ყაზახეთის მრეწველობისა და ინფრასტრუქტურის განვითარების სამინისტრომ უარყო ინფორმაცია დიდ ბრიტანეთში უკრაინაში მიწოდების მიზნით იარაღისა და ჯავშანტექნიკის გაყიდვის შესახებ.
გუშინ, 6 მარტს Bloomberg-მა გაავრცელა ინფორმაცია, რომ კიევის მოკავშირეებმა შეაგროვეს საჭირო თანხა 800 000 ჭურვის შესაძენად. მისივე ცნობით, საბრძოლო მასალა შესაძლოა, ფრონტის ხაზზე მარტსა და აპრილში მოხვდეს.
ჩეხეთის მთავრობამ ინიციატივის შესახებ რამდენიმე კვირის წინ განაცხადა. თებერვლის შუა რიცხვებში მიუნხენის უსაფრთხოების კონფერენციაზე ჩეხეთის პრეზიდენტმა პეტრ პაველმა მოუწოდა გამოიჩინონ „იგივე გამჭრიახობა, რასაც უკრაინელი ჯარისკაცები ავლენენ ფრონტზე“ და ერთობლივად შეიძინონ საბრძოლო მასალა და აღჭურვილობა უკრაინისთვის მთელ მსოფლიოში.
პეტრ პაველმა მაშინ განაცხადა, რომ ჩეხეთმა ნატო-ს სხვა ქვეყნებთან ერთად, მათ შორის დანიასა და კანადასთან ერთად, მოიძია ნახევარი მილიონი 155 მმ-იანი ჭურვი და 300 ათასი 122 მმ-იანი ჭურვი, რომელთა მიწოდება უკრაინისთვის შესაძლებელია რამდენიმე კვირაში, როგორც კი ამ საბრძოლო მასალის შესაძენად საკმარისი თანხა შეგროვდება.
