ნატო-ს გენერალურმა მდივანმა იენს სტოლტენბერგმა გამოთქვა მოსაზრება, რომ რუსი ოპოზიციონერი ლიდერის ალექსეი ნავალნის გარდაცვალებამ და ავდიივკადან უკრაინის შეიარაღებული ძალების უკან დახევამ უნდა გაზარდოს ჩრდილოატლანტიკური ალიანსისა და მისი მოკავშირეების ყურადღება უკრაინის სამხედრო დახმარების გაძლიერების აუცილებლობაზე.
„დარწმუნებული ვარ, რომ ნავალნის ხსოვნისადმი პატივისცემის საუკეთესო გზაა, რომ პუტინს გამარჯვების უფლება არ მივცეთ ბრძოლის ველზე და უზრუნველვყოთ უკრაინის უპირატესობა“, - განაცხადა სტოლტენბერგმა.
ნატო-ს გენერალური მდივნის თქმით, უკრაინული ჯარების ავდიივკადან რამდენიმეთვიანი მძიმე ბრძოლების შემდეგ გაყვანა ცხადყოფს, რომ უკრაინას კიდევ უფრო დიდი სამხედრო დახმარება სჭირდება, ნავალნის კოლონიაში სიკვდილისა და მისი გარდაცვალების გარემოებების ექსპერტიზის შეფერხების შემდეგ კი კიდევ უფრო მეტი ყურადღება უნდა გამახვილდეს კრემლის რეჟიმის ავტორიტარულ თვისებაზე.