ვარშავამ პოლონელ ფერმერთა საპროტესტო აქციებში რუსი აგენტების შესაძლო შეღწევის შესახებ განაცხადა.
„ჩვენი შეფასებით, ანტიუკრაინული ლოზუნგები, რომლებიც გამოჩნდა ფერმერების ბოლო ბლოკირების დროს, არის მცდელობა გააკონტროლონ საპროტესტო მოძრაობა ჯგუფებმა, რომლებიც შესაძლოა იმყოფებოდნენ რუსეთის სადაზვერვო სამსახურების გავლენის ქვეშ“, - განაცხადა საგარეო საქმეთა სამინისტრომ.
უწყების განცხადებაში გამოთქმულია ღრმა შეშფოთება ფერმერთა საპროტესტო აქციებზე რუსეთის პრეზიდენტის ვლადიმირ პუტინისა და მის მიერ გაჩაღებული ომის განდიდების შემცველი პლაკატების გამოჩენის გამო.
ფერმერთა პროტესტი პოლონეთში მიმართულია არა მხოლოდ ევროკავშირის სასოფლო-სამეურნეო პოლიტიკის წინააღმდეგ, არამედ უკრაინის იაფი სოფლის მეურნეობის პროდუქტების წინააღმდეგ. ერთი დღით ადრე ფერმერებმა დაბლოკეს სატრანსპორტო კვანძები პოლონეთის მასშტაბით, ხოლო „მედიკას“ სასაზღვრო გამშვებ პუნქტთან უკრაინული სატვირთო მანქანებიდან მარცვლეული გადაყარეს.
პოლონეთის მთავრობა ღრმად იყო შეშფოთებული სოფელ ჰორზიჩკის კადრებით, რომელშიც ნაჩვენები იყო ტრაქტორი საბჭოთა დროშით და პოსტერით: „პუტინო, აღადგინე წესრიგი უკრაინაში და ბრიუსელში და ჩვენს ოფიციალურ პირებთან“.
პროკურატურამ ტრაქტორის მფლობელის წინააღმდეგ საქმე აღძრა ფაშიზმის, კომუნიზმის ან სხვა ავტორიტარული ფორმის პროპაგანდისა და სიძულვილის წაქეზების ბრალდებით.
პოლონეთი, პოლიტიკურად და სამხედრო თვალსაზრისით, უკრაინის ერთ-ერთი უახლოესი მოკავშირე. ევროკავშირისა და ნატო-ს წევრმა პოლონეთმა უკრაინიდან მილიონამდე ლტოლვილი მიიღო.