"ინვესტიციებზე როდესაც ვსაუბრობთ,უნდა რეალურად ვიფიქროთ. ყველაზე რეალური ინვესტიციები კი დღესაც და 2011 წელს აზერბაიჯანიდან და თურქეთიდან შემოვა. ეს ქვეყნები არიან ჩვენი პირველი სავაჭრო პარტნიორები", - აღნიშნა ჟურნალისტებთან საუბრისას ქობალიამ.

მისივე ინფორმაციით, საქართველოში ინვესტიციების განხორცილების კუთხით დიდი დაინტერესება ისრაელს და ირანს აქვთ.

"გარდა ამ ქვეყნებისა, ინვესტიციების მოზიდვაზე ვიმუშავებთ ევროპის ქვეყნებში, ასევე ამერიკის შეერთებულ შტატებთან და კანადასთან", - განმარტა მინისტრმა.

რაც შეეხება 2011 წელს ეკონომიკის სამინისტროს პრიორიტეტებს. ვერა ქობალია აცხადებს, რომ პრიორიტეტები უცვლელი დარჩება, თუმცა განსაკუთრებული ყურადღება რეგიონებში სოფლის მეურნეობის განვითრებას დაეთმობა, ასევე მომავალი წლიდან სამინისტრო საზღვაო, სახმელეთო და საჰაერო ტრანსპორტის სფეროების განვითარებაზე იზრუნებს.

"ამ კუთხით ძალიან დიდი სამუშაო გვაქვს გასატარებელი", - დასძინა ეკონომიკის მინისტრმა.

როგორც ცნობილია, მთავრობა მიმდინარე წელს ქვეყნაში პირდაპირი უცხოური ინვესტიციების შემოსვლით უკმაყოფილოა.

როგორც დღევანდელ მთავრობის შემაჯამებელ სხდომაზე პრემიერ-მინისტრმა ნიკა გილაურმა აღნიშნა, კარგი იქნებოდა, რომ პირდაპირი უცხოური ინვესტიციების შემოდინების კუთხით საქართველოს გაცილებით კარგი მაჩვნებლები ქონოდა.

"რა არის ცუდი და რას ვისურვებდი, რომ კარგი ყოფილიყო. ეს არის კერძო პირდაპირი ინვესტიციები. ინვესტიციები სამი კვარტლის ანგარიშით არის 450-460 მლნ დოლარი, რაც დიდი ციფრი არ არის. ვისურვებდი, რომ უფრო დიდი მაჩვენებლები გვქონოდა", - აღნიშნა გილაურმა.

პრემიერ-მინისტრის აზრით, 2010 წლის მე-4 კვარტლის მონაცემები შედარებით კარგი იქნება.

"ველოდებით, რომ მე-4 კვარტალი კარგი იქნება, თუმცა, ჯამური პირდაპირი ინვესტიციები, არცთუ ისე მაღალი იქნება. იმედი მაქვს, რომ 2011 წელს უკეთესი მონაცემები გვექნება. რეალურად, პირდაპირი უცხოური ინვესტიციები საერთაშორისო საფინანსო ინსტიტუტებიდან უცხოურმა შემოდინებებმა ჩაანაცვლა. ჩვენ საკმაოდ დიდი თანხები მივიღეთ EBRD-დან, მსოფლიო ბანკიდან, აზიის განვითარების ბანკიდან. უცხოური შემოდინებები მაღალი იყო, როცა კერძო შემოდინებები მაღალი არ იყო",- განაცხადა გილაურმა.