უკრაინის პრეზიდენტის ვოლოდიმირ ზელენსკის განცხადებით, ბრიტანეთის, საფრანგეთისა და გერმანიის გარდა უკრაინამ კიდევ რამდენიმე ქვეყანასთან გააფორმა უსაფრთხოების ორმხრივი შეთანხმება.
„სამი შეთანხმება არსებობს. დღეს კიდევ რამდენიმე ქვეყანასთან გვქონდა საუბარი, არის შეთანხმება უსაფრთხოების ხელშეკრულებებზე. ჩვენ დავაზუსტეთ რამდენიმე ნიუანსიც, სადაც იყო კითხვები ან უთანხმოება. კიდევ რამდენიმე ხელშეკრულება შეთანხმებულია. ჩვენ გავზრდით ამ უსაფრთხოების გარანტიებს,” - განაცხადა ზელენსკიმ.
ზელენსკიმ გერმანიასა და საფრანგეთთან გაფორმებულ შეთანხმებებს ძალიან მნიშვნელოვანი უწოდა.
"ამერიკის შეერთებულ შტატებთან უსაფრთხოების გარანტიები ჯერ არ არსებობს, ჯგუფები უკვე მუშაობენ, უკვე იყო მოლაპარაკებების ორი ეტაპი. მე ამას დადებითად ვხედავ უახლოეს მომავალში", - აღნიშნა ზელენსკიმ.
ამასთან, უკრაინის პრეზიდენტმა ხაზგასმით აღნიშნა, რომ უსაფრთხოების ორმხრივი შეთანხმებები სხვადასხვა სახელმწიფოსთან არ არის ალტერნატივა შეერთებული შტატების დახმარების პაკეტისთვის, რომელიც ჯერ არ არის მიღებული.
„არ მგონია, რომ ეს იყოს აშშ-ის დახმარების ალტერნატივა, მე მკითხეს ამის შესახებ. მე მჯერა, რომ ეს არის ძალიან მნიშვნელოვანი, სრულიად განსხვავებული, დამატებითი დახმარება, რომლის იმედიც უკრაინელებს შეუძლიათ არა ერთი, არა ორი, არამედ 10 წლის განმავლობაში“, - განაცხადა მან.
