კიევში აშშ-ის კონგრესის ორპარტიული დელეგაცია იმყოფება. დელეგაციას კონგრესის წარმომადგენელთა პალატის დაზვერვის კომიტეტის თავმჯდომარე მაიკ ტერნერი ხელმძღვანელობს.
წარმომადგენელთა პალატის წევრებმა განაცხადეს, რომ აშშ მზად არის მომავალშიც გააგრძელოს უკრაინის დახმარება და ეს მათი ვიზიტის მთავარი გზავნილია.
რესპუბლიკელმა ფრენჩ ჰილიმ აღნიშნა, რომ აშშ-ში ჩატარებული გამოკითხვები მიუთითებს იმაზე, რომ ამერიკელებს არ სურთ პუტინის გამარჯვება უკრაინაში.
„ხალხმა იცის, რომ ეს ცუდია არა მხოლოდ ევროპისთვის, უკრაინელი ხალხისთვის, უკრაინის სუვერენიტეტისთვის, არამედ მთელი მსოფლიოსთვის... ჩვენ არ დავუშვებთ, რომ ეს სუვერენული ერი გაანადგუროს რუსულმა დათვმა, რომელიც დაუღალავად ჭამს, მაშინაც კი, როდესაც მშიერი არ არის, ”- თქვა ჰილიმ.
დელეგაციაში ასევე არიან ჯეისონ კროუ, ებიგეილ სპანბერგერი და ზაკ ნანი.
8 თებერვალს, აშშ-ის სენატმა კენჭი უყარა 95 მილიარდი დოლარის დახმარებას უკრაინის, ისრაელისა და ტაივანისთვის, მაგრამ ეს ჯერ არ არის საბოლოო გადაწყვეტილება. ამ დახმარების საკითხი აშშ-ის წარმომადგენელთა პალატაში უნდა განიხილონ.
