უკრაინის პრეზიდენტის ვოლოდიმირ ზელენსკის განცხადებით, 2024 წელს მთავარი ამოცანაა უკრაინის საჰაერო ფარისა და შორ მანძილზე მოქმედების შესაძლებლობების გაძლიერება და რუსეთისთვის მაქსიმალური სისტემური ზარალის მიყენება.

ზელენსკის თქმით, საუბარია კონკრეტულად რუსეთის გაყინულ აქტივებზე. მან აღნიშნა, რომ უკრაინა მაქსიმლურად ენერგიულად მუშაობს პარტნიორებთან, რათა რუსული აქტივების შესახებ გადაწყვეტილება რაც შეიძლება სწრაფად იყოს მიღებული.

ზელენსკიმ თქვა, რომ ოთხშაბათს ევროკავშირის უმაღლეს წარმომადგენელთან ჟოზეფ ბორელთან რუსეთის აქტივების კონფისკაციის თემა განიხილა.

„სამართლიანია პასუხის გაცემა ტერორისტებისთვის, სამართლიანია ტერორისტების განადგურება და სამართლიანია, რომ ტერორისტულმა სახელმწიფომ გადაიხადოს იმის საფასური, რასაც აკეთებს. ჩვენ ვმუშაობთ ჩვენს პარტნიორებთან, რათა რუსეთის აქტივებთან დაკავშირებით გადაწყვეტილება რაც შეიძლება, მალე იყოს მიღებული“, – განაცხადა ზელენსკიმ.

ზელენსკი ასევე გამოეხმაურა მასირებულ იერიშს კიევზე, რომელიც რუსეთმა 7 თებერვალს განახორციელა. ”ჩვენ ვუპასუხებთ რუსეთს ყოველ რაკეტისთვის, ყოველი შაჰედისთვის,” - თქვა მან.

7 თებერვალს დილით კიევზე განხორციელებული სარაკეტო თავდასხმის შედეგად სულ მცირე 4 ადამიანი დაიღუპა და 38 დაშავდა.