დაგეგმილი ყოველწლიური კარნავალის ფონზე, რიო დე ჟანეიროში დენგეს ცხელების შემთხვევათა გავრცელების გამო საზოგადოებრივი ჯანდაცვის საგანგებო მდგომარეობა გამოცხადდა. იტყობინება Associated Press-ი.
მედიის ინფორმაციით, კარნავალი, რომელიც პარასკევს უნდა დაიწყოს, სავარაუდოდ არ გადაიდება, თუმცა ხელისუფლებამ ცხელების გავრცელების აღსაკვეთად გადაუდებელი ზომები შემოიღო.
რიო დე ჟანეიროს მერიის განკარგულებით, ქალაქში გაიხსნა 10 ჯანდაცვის ცენტრი, ასევე გადაუდებელი მედიცინის ცენტრი დენგეს ცხელებით დაავადებული პაციენტებისთვის.
ამასთან, იუწყებიან, რომ მაღალი რისკის რაიონებში, ჰაერში გააფრქვევენ ინტექსიციდებს, რათა ხელი შეუშალოს დაავადების გავრცელებას.
2024 წლის დასაწყისიდან რიოში აღრიცხეს დენგეს ცხელების 10 000-ზე მეტი შემთხვევა, მაშინ როდესაც მთელი გასული წლის განმავლობაში სულ 23 000 შემთხვევა აღირიცხა.
ჯანდაცვის მსოფლიო ორგანიზაციის თანახმად, დენგეს ცხელებით დაავადებული ადამიანების უმეტესობას სიმპტომები არ აღენიშნება. თუმცა ზოგიერთ შემთხვევაში სიმპტომები შეიძლება იყოს მაღალი სიცხე, თავის ტკივილი, სახსრების მტვრევის შეგრძნება, ტკივილები, გულისრევა და გამონაყარი.
პაციენტების უმეტესობის მდგომარეობა უმჯობესდება დაახლოებით ერთ კვირაში, თუმცა ზოგიერთს უვითარდება მძიმე ფორმა და საჭიროებს ჰოსპიტალიზაციას. ასეთ შემთხვევებში დენგეს ცხელება შეიძლება ფატალურად დასრულდეს.
2023 წლის მარტში ბრაზილიამ დაამტკიცა დენგეს ცხელების საწინააღმდეგო ვაქცინა და ამით პირველი ქვეყანა გახდა მსოფლიოში.
დენგეს ცხელების გამომწვევია რნმ შემცველი არბოვირუსი, რომლის გადამტანიც კოღოები არიან.
