პრინცი ჰარი, დიდი ბრიტანეთის მეფის, ჩარლზ მესამის სიმსივნის დიაგნოზის შესახებ ინფორმაციის გასაჯაროების შემდეგ, ლონდონში დაბრუნდა. იუწყება BBC.
გამოცემის ინფორმაციით, ჰარი უკვე კლარენს ჰაუსშია - მეფე ჩარლზისა და დედოფალ კამილას სახლში. მედიასაშუალებების მიერ ასევე ვრცელდება ფოტოები, რომელშიც ჩანს პრინცი ჰარი როგორ გადაადგილდება ავტომობილით.
ამასთან, ადგილობრივი ჟურნალისტების ცნობით, ლონდონში ყოფნისას ჰარი არ შეხვდება თავის ძმას, ტახტის მემკვიდრე პრინც უილიამს.
როგორც ცნობილია, 75 წლის ჩარლზ მესამეს კიბოს დიაგნოზი დაუსვეს.
სამეფო კარის მიერ გავრცელებულ განცხადებაში არ არის დაკონკრეტებული, თუ რა ტიპის კიბო აქვს მეფეს. თუმცა სასახლემ დაადასტურა, რომ მეფეს პროსტატის კიბო არ აქვს, რითაც უარყო მედიაში გავრცელებული ვარაუდი. მედია ვარაუდობდა, რომ მეფეს შეიძლება პროსტატის კიბო ჰქონოდა, რადგან რამდენიმე დღის წინ, იგი პროსტატიტთან დაკავშირებული პრობლემების გამო კლინიკაში იმყოფებოდა.
იუწყებიან, რომ ექიმებმა მეფეს ურჩიეს, დროებით თავი შეიკავოს საზოგადოებრივ აქტივობებში ჩართულობისგან.
მეფემ ორივე შვილს მანამდე აცნობა დიაგნოზის შესახებ, ვიდრე ბუკინგემის სასახლე გამოაცხადებდა, რომ მკურნალობის გამო იგი დროებით ჩამოშორდებოდა საჯარო მოვალეობებს.
