სტამბოლში, სასამართლოს შენობასთან მომხდარი ტერაქტის მცდელობის საქმის გამოძიების ფარგლებში პოლიციამ 30-ზე მეტი ადამიანი დააკავა. ამის შესახებ ჟურნალისტებს თურქეთის იუსტიციის მინისტრმა ილმაზ თუნჩმა განუცხადა.
„ტერაქტის მცდელობის გამოსაძიებლად ექვსი პროკურორი დაინიშნა. დაკავებულია 34 ადამიანი“, - განაცხადა მინისტრმა.
მისი თქმით, თავდასხმის შედეგად ოთხი მოქალაქე დაიჭრა, ასევე დაშავდა სამი პოლიციელი.
თურქეთის შინაგან საქმეთა მინისტრმა ალი ერლიკაიამ მანამდე განაცხადა, რომ ტერორისტულმა ორგანიზაცია „რევოლუციურმა სახალხო გამათავისუფლებელმა პარტიამ” სტამბოლში, სასამართლოს შესასვლელთან ტერორისტული თავდასხმა სცადა. მისი თქმით, დაშავებულია ექვსი ადამიანი, მათ შორის სამი პოლიციელი. ერთ-ერთი მათგანი ჭრილობების შედეგად გარდაიცვალა.
ამასთან, ლიკვიდირებულია ორი თავდამსხმელი, მესამე თავდამსხმელი კი, რომელიც დაშავდა, მალევე დააკავეს.
