ლატვიელმა ფერმერებმა ქვეყნის 16 ქალაქში საპროტესტო აქცია გამართეს, რუსული და ბელარუსული სოფლის მეურნეობის პროდუქტების იმპორტისა და ტრანზიტის აკრძალვის მოთხოვნით.
„ევროკავშირი ნებას რთავს სისხლიანი რუსული მარცვლეულის შემოტანას ჩვენს საერთო ბაზარზე და ტრანსპორტირებას ევროპის პორტებისა და ტერმინალების მეშვეობით. ერთი ხელით ვეხმარებით უკრაინელებს, მეორე ხელით კი აგრესორს ვაძლევთ საშუალებას, უკრაინიდან მარცვლეული მოიპაროს და დიდი მოგებით ევროპაში გაყიდოს. ჩვენ მოვითხოვთ, რომ რუსეთს შეუწყდეს ომის დაფინანსების ეს შესაძლებლობა, - განაცხადეს აქციის მონაწილეებმა.
მათივე თქმით, მომდევნო აქციებს ლატვიის დედაქალაქში გამართავენ, თუ მთავრობა 12 თებერვლამდე მათთან შემხვედრ ნაბიჯებს არ გადადგამს.
ფერმერები ასევე მოითხოვენ ლატვიაში მოყვანილ ხილზე, კენკრასა და ბოსტნეულზე დამატებითი ღირებულების გადასახადის და სოფლის მეურნეობაში ბიუროკრატიული ხარჯების შემცირებას, ასევე სადაზღვევო პროგრამებისადმი წვდომისა და ბრუნვითი კაპიტალის წყაროების გამარტივებას.
