ნორვეგიის თავდაცვის მინისტრმა ბიორნ არილდ გრამმა მოუწოდა ქვეყანას, მოემზადოს რუსეთთან შესაძლო კონფლიქტისთვის უკრაინაში სრულმასშტაბიანი ომის დასრულების შემდეგაც კი.
ნორვეგიის თავდაცვის მინისტრმა ხაზგასმით აღნიშნა, რომ რუსეთში განადგურებულია დემოკრატიის ყლორტები. "არაფერი მიუთითებს იმაზე, რომ რუსეთი გახდება ისეთი, როგორიც ჩვენ ვართ", - განაცხადა მან.
"რუსეთის მოქალაქეების მცირე ნაწილს, ვინც ბედავს პროტესტის გამოხატვას, აპატიმრებენ ან ომში აგზავნიან. იქ მათ საზარბაზნე ხორცად იყენებენ. რუსეთში არ არსებობს ოპოზიცია, არ არის პრესის თავისუფლება, არ არსებობს სამოქალაქო საზოგადოება, რომელსაც უფლება აქვს გამოვიდეს ნებისმიერი მზარდი ავტორიტარული რეჟიმის წინააღმდეგ", - აღნიშნა გრამმა.
ამასთან, გრამმა განაცხადა, რომ უკრაინაში ომის დასრულების შემდეგაც კი, რუსეთის მხრიდან საფრთხე შენარჩუნებული იქნება.
"ჩვენ მზად უნდა ვიყოთ იმისთვის, რომ რუსეთმა შესაძლოა გადააფასოს თავისი გეგმები, მზად უნდა ვიყოთ იმისთვის, თუ სად განათავსებს თავის ძალებს ნატო-ში ფინეთისა და შვედეთის წევრობის საპასუხოდ", - აღნიშნა გრამმა.
ამასთან, მან ხაზი გაუსვა თავდაცვის სფეროში ინვესტიციების გაზრდის, წვრთნებისა და მოკავშირეებთან ნორვეგიის შეიარაღებული ძალების თავსებადობის გაუმჯობესების მნიშვნელობას.
