ევროკავშირი გეგმავს, შეზღუდოს რუსი დიპლომატების გადაადგილება იმ ქვეყანაში, სადაც ისინი არიან აკრედიტებულები.
Politico-ს ცნობით, ასეთი შეზღუდვის შეტანა იგეგმება რუსეთის წინააღმდეგ სანქციების მე-13 პაკეტში, რომელზეც ამჟამად მიმდინარეობს მუშაობა.
ევროკავშირის სანქციების მე-13 პაკეტის დამტკიცება 24 თებერვალს, რუსეთის მიერ უკრაინაში შეჭრის მეორე წლისთავზეა დაგეგმილი.
როგორც იუწყებიან, ამ შეზღუდვის დაწესების ინიციატივით ჩეხეთი გამოვიდა, რომელიც გასულ წელს დაჟინებით მოითხოვდა რუსი დიპლომატებისთვის გადაადგილების თავისუფლების შეწყვეტას. ჩეხეთის ხელისუფლებამ ასეთი მიდგომის აუცილებლობა ახსნა იმით, რომ "ქვეყანაში რუსეთის სპეცსამსახურების აგენტები ჩამოდიან".
თუმცა, Politico წერს, რომ ჯერჯერობით უცნობია, როგორ განხორციელდება გეგმა, რადგან შენგენის ზონაში მოგზაურობა ხშირად არ კონტროლდება.
გამოცემის წყაროები აღნიშნავენ, რომ ევროკომისია ასევე გააფართოვებს რუსული კომპანიების სიებს, რომლებზეც ევროპული კომპანიები ორმაგი დანიშნულების საქონელსა და სამხედრო პროდუქტებს ვერ ყიდიან.
Politico-ს ცნობით, რუსული ალუმინის აკრძალვის საკითხდი, დიდი ალბათობით, მე-13 პაკეტში ვერ მოხვდება.
"რუსული მეტალი ჯერ კიდევ სჭირდება ევროპულ მრეწველობას და 24 თებერვლამდე დარჩენილი დროის განმავლობაში, ევროკავშირის მაღალჩინოსნებს ვერ შეძლებენ ამ საკითხზე შეთანხმებას", - წერს Politico.
ამავდროულად, Reuters-ის ცნობით, მე-13 პაკეტში არ იქნება შეტანილი აკრძალვები იმპორტზე. მოსალოდნელია, რომ იმპორტის ახალი აკრძალვები შეტანილი იქნება სანქციების მე-14 პაკეტში, რომელსაც ევროკომისია მე-13 პაკეტის დამტკიცებიდან მალევე წარადგენს.
