გერმანიის თავდაცვის სამინისტროში უკრაინის სპეციალური შტაბის უფროსი და კიევის მხარდაჭერის კოორდინატორი, გენერალ-მაიორი კრისტიან ფროიდინგი მიიჩნევს, რომ უკრაინელ სამხედროებს შეუძლიათ ომის დასრულება ბრძოლის ველზე რუსეთის დამარცხებით, მაგრამ საბრძოლო მასალის მიწოდება რჩება დასავლეთის მხარდაჭერის ცენტრალური საკითხად.
ამის შესახებ ფროიდინგმა RND-თან ინტერვიუში განაცხადა.
„ჩვენ დარწმუნებული ვართ ჩვენი მხარდაჭერის ღირებულებაში, ჩვენ დარწმუნებული ვართ უკრაინის პარტნიორების ერთიანობაში, რომლებსაც აქვთ სურვილი, შეუპოვრად მიაღწიონ იმ შედეგს, რაც ჩვენ ყველას გვინდა“, - თქვა მან.
შეკითხვაზე, თუ როდის დასრულდება რუსეთ-უკრაინის სრულმასშტაბიანი ომი, რომელიც თითქმის ორი წელია გრძელდება, ფროიდინგმა თქვა: „ის დასრულდება მაშინ, როცა ომში უკრაინა გაიმარჯვებს“.
მისი თქმით, გერმანიიდან წელს უკრაინისთვის საბრძოლო მასალის მიწოდების გაორმაგება იგეგმება.
„სისტემების უმეტესობა, რომელსაც ახლა უკრაინა იყენებს, ბევრად უფრო ზუსტია, ვიდრე რუსული. მხოლოდ გერმანიიდან წელს ჩვენ ალბათ შევძლებთ საარტილერიო საბრძოლო მასალის მარაგის გაორმაგებას. თუმცა, საბრძოლო მასალის მიწოდება რჩება დასავლეთის მხარდაჭერის ცენტრალურ საკითხად”, - თქვა მან.
ფროიდინგი ასევე მიიჩნევს, რომ უკრაინას მობილიზაცია სჭირდება ბრძოლის ველზე დანაკარგების შესავსებად და საბრძოლო დანაყოფების აღსადგენად.
