2023 წელს რუსეთში თვითმფრინავის ყოველ 100 000 გაფრენაზე სტატისტიკურად 9,9 ავიაუსაფრთხოებასთან დაკავშირებული ინციდენტი მოდიოდა. ეს ორჯერ მეტია, ვიდრე 2022 და (პანდემიამდელ) 2019 წელს, როდესაც ეს მაჩვენებელი იყო, შესაბამისად, 5 და 4,5.
ამ დასკვნამდე მივიდნენ გამოცემა The Wall Street Journal-ის ანალიტიკოსები კომპანია Cirium-ის მონაცემების შესწავლის შემდეგ, რომელიც საჰაერო ფრენებთან დაკავშირებულ ინფორმაციას აგროვებს. გამოცემამ გამოაქვეყნა ანალიზის შედეგები რუსული თვითმფრინავების უსაფრთხოების შესახებ.
ჟურნალისტების ცნობით, დასავლეთის სანქციებმა გავლენა მოახდინა რუსეთის შესაძლებლობაზე, შეიძინოს თვითმფრინავების სათადარიგო ნაწილები, აწარმოოს კრიტიკული პროგრამული უზრუნველყოფის განახლებები და განახორციელოს თვითმფრინავების სათანადო ტექნიკური მომსახურება. მათ ასევე მოჰყავთ მონაცემები გერმანული პორტალ Jacdec-დან, რომელიც აგროვებს ინფორმაციას 19 და მეტადგილიანი თვითმფრინავების უსაფრთხოებასთან დაკავშირებულ ინციდენტებზე. მათი ცნობით, გასულ წელს რუსეთში ფრენის უსაფრთხოებასთან დაკავშირებული დაახლოებით 74 ინციდენტი დაფიქსირდა, როცა 2022 წელს 36 შემთხვევა იყო.
„მიუხედავად იმისა, რომ ინციდენტების უმეტესობას არ მოჰყვა სერიოზული დაზიანებები ან ავარიები, ექსპერტები უსაფრთხოების სფეროში ამბობენ, რომ მუდმივი მექანიკური გაუმართაობა სერიოზულ რისკს უქმნის მგზავრების უსაფრთხოებას და ზრდის პილოტის დატვირთვას, რამაც შეიძლება გამოიწვიოს უფრო სერიოზული ინციდენტები“, - ნათქვამია პუბლიკაციაში.
უკრაინაში ომის დაწყების შემდეგ, მოსკოვმა შემოიღო ახალი კანონები, რომლებიც საშუალებას აძლევს რუსულ კომპანიებს დამოუკიდებლად განახორციელონ თვითმფრინავების ტექნიკური მომსახურება, საკუთარი კომპონენტების წარმოება და ნაწილებისთვის გაჩერებული თვითმფრინავების დემონტაჟი.
WSJ-ის ცნობით, ექსპერტების აზრით, რომლებიც აკვირდებიან სანქციების ზემოქმედებას, რუსეთი განსაკუთრებით განიცდის შასებისა და მუხრუჭების დეფიციტს და იძულებულია თვითმფრინავები ირანში გაგზავნოს ტექმომსახურებისთვის. კიდევ ერთი პრობლემაა ბორბლების შეკეთების დროს საბურავების შედუღების ტექნოლოგიური ნოუჰაუს ნაკლებობა და დაბალი ხარისხის ყინვაგამძლე რეაგენტების გამოყენების ცალკეული შემთხვევები, რამაც ასევე უკვე გამოიწვია უსაფრთხოებასთან დაკავშირებული ინციდენტები.
კომპანია Cirium-ის ცნობით, დღეს რუსეთში რეგისტრირებულია 19 და მეტადგილიანი1031 თვითმფრინავი. მათი ორ მესამედზე მეტს აწარმოებენ უცხოური კომპანიები, მათ შორის Airbus და Boeing.
