გაერო-ს გენერალური მდივანი ანტონიო გუტერეში მოკავშირეებს მოუწოდებს, განაახლონ პალესტინელ ლტოლვილთა დახმარების სააგენტოს დაფინანსება. გუტერეში პირობას დებს, რომ პასუხისგებაში მიეცემა სააგენტოს ყველა ყოფილი თანამშრომელი, რომელიც ისრაელზე „ჰამასის“ 7 ოქტომბრის თავდასხმაში მონაწილეობდა.
მანამდე პალესტინელ ლტოლვილთა დახმარების სააგენტოს გენერალურმა კომისარმა ფილიპ ლაზარინიმ განაცხადა, რომ სააგენტოს თანამშრომლები, რომლებიც ეჭვმიტანილები იყვნენ ისრაელზე 7 ოქტომბერს ჰამასის თავდასხმაში, სამსახურიდან გაათავისუფლეს და ბრალის დამტკიცების შემთხვევაში სასამართლოს წინაშე წარდგებიან. ამასთან, ფინეთმა, დიდმა ბრიტანეთმა, იტალიამ, ავსტრალიამ, კანადა, გერმანიამ და კიდევ რამდენიმე ქვეყანამ უკვე გამოაცხადა სააგენტოს დაფინანსების შეწყვეტის შესახებ.
„ღაზაში ორი მილიონი მშვიდობიანი მოქალაქე დამოკიდებულია სააგენტოს კრიტიკულ დახმარებაზე, რათა ყოველდღიურად გადარჩენენ, მაგრამ პალესტინელ ლტოლვილთა დახმარების სააგენტოს დაფინანსების ამჟამინდელი მოცულობა ვერ დააკმაყოფილებს მათ ყველა საჭიროებას თებერვალში. მიუხედავად იმისა, რომ მე მესმის მათი შეშფოთება და მე თვითონ შოკირებული ვარ ამ ბრალდებების გამო, მტკიცედ მოვუწოდებ მთავრობებს, რომლებმაც შეაჩერეს დაფინანსება, რათა უზრუნველყონ სააგენტოს უწყვეტი საქმიანობა“, - განაცხადა გუტერეშმა.
როგორც სააგენტომ განაცხადა, ისრაელისგან მიიღეს მტკიცებულებები 12 თანამშრომლის სავარაუდო მონაწილეობის შესახებ 2023 წლის 7 ოქტომბერს „ჰამასის“ მიერ ისრაელზე განხორციელებულ თავდასხმაში.
„მივიღე გადაწყვეტილება დაუყოვნებლივ შევუწყვიტო ამ თანამშრომლებს შრომითი ხელშეკრულებები და ჩავატარო გამოძიება სიმართლის სწრაფად დადგენის მიზნით“, - განაცხადა სააგენტოს გენერალურმა კომისარმა ფილიპ ლაზარინიმ.
