პოლონეთის საგარეო საქმეთა მინისტრი რადოსლავ სიკორსკი აცხადებს, რომ ნატო-ს ქვეყნები რუსეთის შესაძლო შეჭრისთვის უნდა მოემზადონ. მან ამის შესახებ რუსულ გამოცემა „ნასტოიაშეე ვრემიას“ განუცხადა.
„არ ვაპირებ სპეკულირებას. მაგრამ როდესაც პრეზიდენტი პუტინი სხვა ქვეყნებს უმუქრება, ისე როგორც შეჭრის წინ ემუქრებოდა უკრაინას, ვშიშობ, რომ ეს დასაჯერებელია და ამისთვის უნდა მოვემზადოთ“, - განაცხადა სიკორსკიმ.
შეკითხვაზე, სჯერა თუ არა მას, რომ რუსულმა ტანკებმა შესაძლოა, გადაკვეთონ ნატო-ს საზღვრები, სიკორსკიმ განაცხადა: „ჩვენ ახლა ვიწყებთ ისტორიაში ყველაზე მასშტაბურ ნატო-ს წვრთნებს, მასში მონაწილეობს 90 ათასი სამხედრო. ამიტომ, რუსეთმა არც კი სცადოს, რადგან ის წააგებს. უკრაინელი ჯარისკაცების სიმამაცის წყალობით, რუსეთმა უკვე დაკარგა თავისი ტანკებისა და სხვა ტექნიკის დაახლოებით ნახევარი“, - განაცხადა სიკორსკიმ.
ამასთან, მან გააკრიტიკა ევროკავშირი დაგვიანებული მოქმედებებისთვის და მოუწოდა რაც შეიძლება სწრაფად დაეხმარონ უკრაინას საბრძოლო მასალითა და საჰაერო თავდაცვის სისტემებით.
