უკრაინის საგარეო საქმეთა სამინისტრომ უპასუხა სლოვაკეთის პრემიერ-მინისტრის რობერტ ფიცოს განცხადებას, რომლის თანახმად, უკრაინა რუსთისთვის ტერიტორიების დათმობას უნდა დათანხმდეს.
უწყების წარმომადგენლის ოლეგ ნიკოლენკოს განცხადებით, „ტერიტორიულ კომპრომისზე“ საუბარი გამორიცხულია.
მისივე თქმით, უკრაინა და პარტნიორები ძალისხმევას არ იშურებენ, რათა რუსეთმა ჯარები გაიყვანოს ყირიმიდან, დონბასიდან და ლუჰანსკიდან, იმისათვის, რომ რუსეთი არ წავიდეს უფრო შორს - მაგალითად, სლოვაკეთის რეგიონებისკენ.
„მოდით, გულწრფელად ვისაუბროთ: უკრაინის უსაფრთხოების გარეშე, არ იქნება უსაფრთხოება არც სლოვაკეთში და არც მთლიანად ევროპაში. ჩვენ ერთად უნდა ვიმუშაოთ უკრაინის გამარჯვების მოსაახლოებლად“, - განაცხადა უკრაინის საგარეო საქმეთა სამინისტროს წარმომადგენელმა.
სლოვაკეთის პრემიერ-მინისტრი რობერტ ფიცო 24 იანვარს, უკრაინელ კოლეგას დენის შმიჰალთან შეხვედრას გეგმავს. შეხვედრის წინ მან სკანდალური განცხადებები გააკეთა. კერძოდ, განაცხადა, რომ შმიჰალთან შეხვედრაზე აპირებს თქვას, რომ ყველაფერს გააკეთებს იმისათვის, რათა ნატო-ში უკრაინის გაწევრიანება დაბლოკოს.
მისივე თქმით, უკრაინა "აშშ-ის აბსოლუტური გავლენის ქვეშ" იმყოფება და მიანიშნა, რომ მას რუსეთისთვის თავისი ტერიტორიის ნაწილის დათმობა მოუწევს.
"უნდა იყოს რაიმე სახის კომპრომისი, რომელიც ძალიან მტკივნეული იქნება ორივე მხარისთვის. რას ელოდებიან, რომ რუსები დატოვებენ ყირიმს, დონბასს და ლუჰანსკს? ეს არარეალურია", - განაცხადა ფიცომ.
