19 იანვარს მიუნხენში ლეგენდარული გერმანელი ფეხბურთელის ფრანც ბეკენბაუერის გამოსამშვიდობებელი ცერემონია გაიმართა.
მიუნხენის საფეხბურთო კლუბ "ბაიერნის" სტადიონზე გამართულ ცერემონიას 20 ათასი ადამიანი დაესწრო, მათ შორის გერმანიის პრეზიდენტი ფრანკ-ვალტერ შტაინმაიერი და გერმანიის კანცლერი ოლაფ შოლცი.
"ჩვენ უბრალოდ არ ვემშვიდობებით მსოფლიო დონის ფეხბურთელს, ჩვენ ვემშვიდობებით დიდ ადამიანს", - აღნიშნა შტაინმაიერმა თავის გამოსვლაში და ბეკენბაუერს მისაბაძი ადამიანი უწოდა, რომელმაც უამრავი ბედნიერი წუთი აჩუქა სამშობლოს.
ცერემონიას ესწრებოდნენ ბავარიის პრემიერ მინისტრი, ბაიერნის საფეხბურთო კლუბის პრეზიდენტი, გერმანიის ნაკრების მოქმედი და ვეტერანი მოთამაშეები მწვრთნელებთან ერთად, ბუნდესლიგის, ფიფას და უეფას პრეზიდენტები.
ფრანც ბეკენბაუერი მე-20 საუკუნის ერთ-ერთ საუკეთესო ფეხბურთელად ითვლება. მან კარიერის დიდი ნაწილი მიუნხენის ბაიერნში გაატარა.
ბეკენბაუერმა ორჯერ მოიგო მსოფლიო ჩემპიონატი: პირველად 1974 წელს, როგორც ფეხბურთელი, მეორედ 1990 წელს, როგორც მწვრთნელი. გარდა ამისა, მან ორჯერ მოიგო ოქროს ბურთი და სამჯერ ევროპის თასი. ფრანც ბეკენბაუერი გერმანიაში ოთხჯერ დასახელდა წლის საუკეთესო ფეხბურთელად. 1994 წლიდან 2009 წლამდე ბეკენბაუერი ბაიერნის კლუბის პრეზიდენტი იყო.
ფრანც ბეკენბაუერი 78 წლის ასაკში, 7 იანვარს გარდაიცვალა.
