უკრაინის შეიარაღებული ძალების მთავარსარდალმა ვალერი ზალუჟნიმ დაადასტურა რუსული მზვერავი თვითმფრინავის А-50 და ბომბდამშენის Ил-22 განადგურება.
”მადლობა საჰაერო ძალებს აზოვის რეგიონში იდეალურად დაგეგმილი და შესრულებული ოპერაციისთვის”, - წერს ვალერი ზალუჟნი თავის Telegram არხზე ორშაბათს, 15 იანვარს.
მანამდე ვრცელდებოდა ინფორმაცია, რომ უკრაინელმა სამხედროებმა ჩამოაგდეს А-50, ხოლო Ил-22 დააზიანეს.
А-50 გამოიყენება შორ მანძილზე სამიზნეებზე მეთვალყურეობისა და თავდასხმების აღსაკვეთად. ოფიციალური მონაცემებით, რუსეთს 10-მდე ასეთი თვითმფრინავი ჰყავს. ერთი A-50-ის ღირებულება 330 მილიონ დოლარად არის შეფასებული.
რუსეთის თავდაცვის სამინისტროს ოფიციალური კომენტარი აღნიშნულთან დაკავშირებით ჯერჯერობით არ გაუკეთებია.
ფოტოზე: რუსული მზვერავი თვითმფრინავი А-50/არქივი
