ევროპის უსაფრთხოებისა და თანამშრომლობის ორგანიზაციის (ეუთო) მოქმედმა თავმჯდომარემ, მალტის საგარეო საქმეთა მინისტრმა იან ბორგმა და ეუთოს გენერალურმა მდივანმა ჰელგა შმიდმა დაგმეს რუსეთის საჰაერო თავდასხმები უკრაინაზე.
"ჩვენ მკაცრად ვგმობთ ამ თავდასხმებს და მოვუწოდებთ, დაუყონებლივ შეწყდეს დაუნდობელი ძალადობა, რომელსაც არაფერს მოაქვს გარდა უბედურებისა და ტანჯვის ციკლის გახანგრძლივებისა. ჩვენ მოვუწოდებთ დაუყოვნებლივ შეწყდეს ეს ომი", - აცხადებენ ისინი.
ბორგმა და შმიდმა აღნიშნეს, რომ ახალი წელი დაიწყო "ისევე დამთრგუნველად, როგორც წინა დასრულდა", სიკვდილით და ნგრევით, რომელმაც სამოქალაქო პირების სიცოცხლე შეიწირა და სასიცოცხლო ინფრასტრუქტურა გაანადგურა.
"ამ საშინელი კონფლიქტის მსხვერპლნი ყოველდღიურად არიან სამოქალაქო პირები. ისინი არასოდეს უნდა გახდნენ სასიკვდილო თვითმფრინავების და სარაკეტო თავდასხმების მსხვერპლნი", - ნათქვამია განცხადებაში.
2 იანვარს, დილით, რუსეთმა უკრაინაზე მასიური სარაკეტო შეტევა განახორციელა.
უკრაინის შეიარაღებული ძალების მთავარსარდალმა ვალერი ზალუჟნიმ განაცხადა, რომ რუსებმა უკრაინაში სხვადასხვა ტიპის 99 რაკეტა გაუშვეს, რომელთაგან 72 განადგურდა.
