შეერთებული შტატებისა და მსოფლიოს ერთ-ერთი წამყვანი საგანმანათლებლო დაწესებულების, ჰარვარდის უნივერსიტეტის პრეზიდენტი კლოდინ გეი თანამდებობიდან გადადგა.
პრეზიდენტის თანამდებობიდან გადადგომა უკავშირდება პლაგიატზე ბრალდებებსა და მის კომენტარებს კამპუსში ანტისემიტიზმთან დაკავშირებით.
კლოდინ გეი ბოლო კვირების განმავლობაში მზარდ ზეწოლას განიცდიდა თანამდებობიდან გადადგომის შესახებ.
გადადგომის შესახებ წერილში მან თქვა, რომ ეს გადაწყვეტილება უნივერსიტეტის "საუკეთესო ინტერესებში" იყო.
ჰარვარდის, პენსილვანიის და მასაჩუსეტსის ტექნოლოგიური უნივერსიტეტების პრეზიდენტები, მწვავე კრიტიკის ობიექტები გახდნენ, კამპუსებში ანტისემიტიზმის გამოვლენასთან დაკავშირებით. ამ საკითხებზე უნივერსიტეტების პრეზიდენტებმა აშშ-ის კონგრესში გამართულ მოსმენაზე მისცეს ჩვენებები. მოსმენის შემდეგ, პენსილვანიის უნივერსიტეტის პრეზიდენტი გადადგა.
კონგრესის დაძაბულ მოსმენაზე კლოდინ გეიმ, დასმულ შეკითხვაზე - არის თუ არა ებრაელთა გენოციდის მოწოდებები ჰარვარდის ეთიკის კოდექსის დარღვევა, მან უპასუხა, რომ ებრაელთა გენოციდის მოწოდებები საშინელებაა. თუმცა, დასძინა, რომ კონტექსტზეა დამოკიდებული, იქნება თუ არა ასეთი მოწოდებები ჰარვარდის ეთიკის კოდექსის დარღვევა.
ამ კომენტარს დიდი გამოხმაურება მოჰყვა და მოგვიანებით მან ბოდიში მოიხადა უნივერსიტეტის სტუდენტურ გაზეთთან ინტერვიუში.
მას შემდეგ ამერიკულმა მედიასაშუალებებმა მის აკადემიურ ნაშრომებში სავარაუდო პლაგიატის რამდენიმე შემთხვევა აღმოაჩინეს. ჰარვარდის საბჭომ გამოიძია ეს შემთხვევები და გამოავლინა ორი გამოქვეყნებული ნაშრომი, რომლებიც საჭიროებდნენ დამატებით ციტირებას, თუმცა ამით არ დარღვეულა "გადაცდომის სტანდარტები".
შეგახსენებთ, მანამდე ისრაელზე ჰამასის ტერორისტების თავდასხმას ჰარვარდის უნივერსიტეტის სტუდენტების მცირე ჯგუფი გამოეხმაურა, რომელთაც სასტიკ თავდასხმაზე პასუხისმგებლობა "ისრაელის აპარტეიდულ რეჟიმს" დააკისრეს.
