უკრაინის პრეზიდენტმა ვოლოდიმირ ზელენსკიმ 29 დეკემბერს რუსეთის მასირებული სარაკეტო თავდასხმის შემდეგ ვიდეომიმართვისას აღნიშნა, რომ უკრაინა უპასუხებს ყველა დარტყმას. მიისვე თქმით, მნიშვნელოვანია, რომ მსოფლიოს ჰქონდეს რეაგირება ამ ტერორზე.
უკრაინის პრეზიდენტის თქმით, დანგრეულია ან დაზიანებულია 100-ზე მეტი კერძო სახლი, 45 მრავალსართულიანი კორპუსი, სკოლები, ორი ეკლესია, საავადმყოფოები, სამშობიარო, სავაჭრო ცენტრი და სასაწყობე ნაგებობები.
ზელენსკიმ განაცხადა, რომ მისი გუნდი აგრძელებს მუშაობას საჰაერო თავდაცვის გასაძლიერებლად.
„მნიშვნელოვანია, რომ მსოფლიომ რეაგირება მოახდინოს ტერორის ამ მორიგ გამოვლინებაზე. დღეს ბევრმა ლიდერმა უკვე გამოხატა მხარდაჭერა უკრაინისა და უკრაინელების მიმართ და მე მადლობელი ვარ ყველასი. განსაკუთრებით მათი, ვინც დაეხმარა ჩვენს საჰაერო თავდაცვას”, - განაცხადა ზელენსკიმ.
უკრაინის პრეზიდენტმა ასევე მადლობა გადაუხადა მაშველებს, პოლიციას და ყველას, ვინც ეხმარება ხალხს.
"ჩვენ აუცილებლად ვუპასუხებთ რუს ტერორისტებს ყოველო დარტყმისთვის. ტერორი არასოდეს გაიმარჯვებს ხალხზე. 600-ზე მეტი ჩვენი მაშველი ჩართულია სამუშაოებში, ნანგრევების გაწმენდაში, არის უამრავი ტექნიკა. სამუშაოები გაგრძელდება 24 საათის განმავლობაში", - თქვა ზელენსკიმ.
29 დეკემბერს რუსეთმა უკრაინის წინააღმდეგ ყველაზე მასშტაბური საჰაერო დარტყმები განახორციელა. თავდასხმის ქვეშ მოექცნენ კიევი, ხარკოვი, დნიპრო, ოდესა, ლვოვი, ზაპოროჟიე და სხვა ქალაქები.
ბოლო მონაცემებით, დაღუპულია 26 და დაშავებულია 160-ზე მეტი ადამიანი.
