ამერიკულმა გამოცემა New York Times-მა გამოაქვეყნა მასალები, რომლის მიხედვითაც ისრაელის უსაფრთხოების სამსახურებმა დიდი ხნის წინ იცოდნენ კომპანიების შესახებ, რომლებიც ლეგალურად აფინანსებდნენ „ჰამასს“. საუბარია, ასობით მილიონი დოლარის ღირებულების აქტივებზე, მათ შორის სამთო-მომპოვებელ საწარმოებზე სუდანში, უძრავ ქონებაზე არაბთა გაერთიანებულ საამიროებში და სამშენებლო კომპანიებზე ალჟირში.
„ჰამასის“ აგენტების ქსელმა დაიკავა მაღალი თანამდებობები ამ კომპანიებში და სხვადასხვა გზით მათგან ფულს იღებდა - როგორც მიღებული მოგების სახით, ასევე, შეკვეთების სახით „ჰამასის“ მიერ კონტროლირებადი სხვა კომპანიებისთვის - და აგზავნიდა მას დაჯგუფების საჭიროებებისთვის.
გამოცემა წერს, რომ სადაზვერვო სამსახურების თანამშრომლებმა შესაბამისი ინფორმაცია მიაწოდეს ისრაელისა და ამერიკის ხელისუფლებას, თუმცა მათ ის რეაგირების გარეშე დატოვეს.
ისრაელელი და ამერიკელი მაღალჩინოსნები მაშინ მიიჩნევდნენ, რომ „ჰამასის“ ხელმძღვანელობა უფრო დაინტერესებული იყო ღაზის სექტორში ძალაუფლების შენარჩუნებით, ვიდრე ისრაელთან შეიარაღებული დაპირისპირებით.
გამოცემის ცნობით, „ჰამასის“ ფინანსური პორტფელი ახლა დაახლოებით ნახევარ მილიარდ დოლარს შეადგენს. თუ ეს შედინება არ დაიბლოკება, ის შეიძლება გამოყენებულ იქნას მიმდინარე ომის დასაფინანსებლად და მისი დასრულების შემდეგ დაჯგუფების ქსელის აღსადგენად.
2018 წელს ისრაელის სადაზვერვო სამსახურები იმედოვნებდნენ, რომ გადაკეტავდნენ „ჰამასის“ დაფინანსებას, მაგრამ ისრაელისა და ამერიკის ხელისუფლებებმა ყურადღება გაამახვილეს ირანის წინააღმდეგ სანქციების დაწესებაზე.
რამდენად ითამაშა როლი ამ ფინანსებმა "ჰამასის" 7 ოქტომბრის თავდასხმების მომზადებაში, ჯერჯერობით უცნობია, თუმცა ისრაელის ოფიციალურმა პირებმა პირობა დადეს, რომ საფუძვლიანად გამოიძიებენ ყველა დონეზე დაშვებულ შეცდომებს, რამაც დაჯგუფებას საშუალება მისცა განეხორციელებინა წარმატებული თავდასხმა ისრაელზე.
