თელ ავივის ხელოვნების მუზეუმთან მდებარე მოედანზე ათობით ადამიანი შეიკრიბა. ისრაელის სამხედროების მიერ შეცდომით სამი ადამიანის მოკვლის შემდეგ ამ ადგილს „მძევლების მოედანი“ შეარქვეს. იუწყება BBC
მოედანი იქცა იმ ოჯახების მტანჯველი ლოდინის სიმბოლოდ, რომელთა ახლობლები ჰამასის მებრძოლებმა მძევლად აიყვანეს.
70 დღის წინ გატაცებული მძევლების ფოტოები განათების ბოძებსა და კედლებზეა მიკრული. "სასწრაფოდ დააბრუნეთ ისინი სახლებში", - წერია ფოტოების ქვეშ.
ამ დროისათვის ღაზაში მძევლად 100-ზე მეტი ადამიანი რჩება.
როგორც ცნობილია, ისრაელელი სამხედროების ცეცხლს შეცდომით სამი ისრაელელი მძევალი ემსხვერპლა.
ისრაელის თავდაცვის ძალების ოფიციალური წარმომადგენლის თქმით, ერთ-ერთმა ისრაელელმა ჯარისკაცმა დაინახა მძევლები, რომლებიც გამოდიოდნენ შენობიდან და ხელში თეთრი ქსოვილი ეჭირათ.
ჯარისკაცმა საფრთხე იგრძნო და ცეცხლი გახსნა, მისი თქმით, ისინი ტერორისტები იყვნენ.
ორი მძევალი მაშინვე დაიღუპა, ერთი კი დაშავდა და ისევ შენობაში შევარდა.
ამის შემდეგ ჯარისკაცებმა გაიგეს როგორ ითხოვდნენ ებრაულად დახმარებას და ცეცხლი შეწყვიტეს.
ისრაელის თავდაცვის ძალების სპიკერის დანიელ ჰაგარის განცხადებით, დაღუპულებს შორის არიან კფარ აზადან გატაცებული იოტამ ჰაიმი და ნირ ამიდან გატაცებული სამარ ტალალკა. თავდაპირველად მესამე დაღუპულის სახელი ოჯახის თხოვნით არ დასახელდა, თუმცა მოგვაინებით ცნობილი გახდა,რომ ის აკონ შამრიზია.
დროებითი ზავის შედეგად დაახლოებით 100 მძევალი გათავისუფლდა, ოჯახები მოუწოდებენ ისრაელის მთავრობას მიაღწიოს ახალ შეთანხმებას ჰამასთან, სხვა გატაცებული ადამიანების გათავისუფლების მიზნით.
ისრაელის ხელისუფლება ამტკიცებს, რომ მათი სახლში დაბრუნების ერთადერთი გზა სამხედრო ზეწოლაა.
მედია წერს, რომ ისრაელის თავდაცვის ძალების მიერ შეცდომით სამი მძევლის მოკვლის შემდეგ პრემიერ-მინისტრ ბენიამინ ნეთანიაჰუზე ზეწოლა გაძლიერდება.
