750 ათასი ევროს ღირებულების ბეჭედი, რომელიც პარიზის ფეშენებელურ სასტუმრო Ritz-ში დაიკარგა, მტვერსასრუტში იპოვეს. მის მფლობელს ეგონა, რომ ბეჭედი მოიპარეს და პოლიციას მიმართა.
ძვირფასეულობის მფლობელმა, მალაიზიელმა ბიზნესმენმა ბეჭდის გაუჩინარების შესახებ პოლიციაში 8 დეკემბერს განაცხადა და ეჭვი გამოთქვა, რომ ის სასტუმროს პერსონალმა მოიპარა.
როგორც გამოცემა Le Parisien-ი იუწყება, ბეჭედი მტვერსასრუტის ნაგვის დაგროვების ტომარაში აღმოჩნდა. მათივე ცნობით, მისი მფლობელი უკვე ლონდონში გაფრინდა, თუმცა ბეჭდის დასაბრუნებლად უკან დაბრუნდება.
ფეშენებელური სასტუმროების ქსელის წარმომადგენელმა მედიას განუცხადა, რომ ქალს სასტუროში სამი დღით უფასო მომსახურეობა შესთავაზეს, თუმცა ის ამ წინადადებას სავარაუდოდ, არ დათანხმდება.
ბეჭდის მფლობელმა პოლიციას აცნობა, რომ 8 დეკემბერს ძვირფასეულობა თავის ნომერში, მაგიდაზე დატოვა და რამდენიმე საათით გავიდა, როდესაც სასტუმროს ნომერში დაბრუნდა, ბეჭედი, რომელსაც უიშვიათესი ბრილიანტი ამკობდა, მაგიდაზე აღარ დახვდა.
ახლა ბეჭედი პოლიციის განყოფილებაში ინახება და იქ დარჩება, ვიდრე მისი მფლობელი წასაღებად არ მივა.
ცნობილი ხუთვარსკვლავიანი სასტუმრო Ritz-ი პარიზის ცენტრში, ვანდომის მოედანზე მდებარეობს. უნდა აღინიშნოს, რომ ძვირფასეულობა სასტუმროდან მანამდეც დაკარგულა.
2018 წელს ნაჯახებით შეიარაღებულმა თავდამსხმელებმა სასტუმროში მდებარე საიუველირო მაღაზია გაძარცვეს და რამდენიმე მილიონი ევროს ღირებულების ძვირფასეულობა წაიღეს.
იმავე წელს საუდის არაბეთის სამეფო ოჯახის ერთ-ერთმა წევრმა განაცხადა, რომ სასტუმროს ნომრიდან 800 000 ევროს ღირებულების სამკაულები დაკარგა.
