ესტონეთის მთავრობა მზად არის დახუროს საზღვარი რუსეთთან, როდესაც მიგრანტების ნაკადთან დაკავშირებით ვითარება გაუარესდება, თუმცა ამ დროისთვის სიტუაცია სტაბილურია და სრულ კონტროლს ექვემდებარება.
”ჩვენ ახლა საქმე გვაქვს დაბალი ინტენსივობის მიგრაციულ შემოტევასთან. რადგან ჩვეულებრივ სიტუაციაში რუსეთის ფედერაცია არ აძლევს ხალხს საზღვრის გადაკვეთის უფლებას საჭირო დოკუმენტების გარეშე. მაგრამ რუსეთის ასეთი ქმედება სულაც არ არის გასაკვირი - ჩვენ ამისთვის ვემზადებოდით და ვვარაუდობდით, რომ ამ იარაღს ჩვენს წინააღმდეგ გამოიყენებდნენ“, - განაცხადა ესტონეთის პრემიერ-მინისტრმა კაია კალასმა.
მისი თქმით, ვითარება სტაბილურია და სრული კონტროლის ქვეშაა. გარდა ამისა, ყველა სასაზღვრო პუნქტებზე ყველაფერია, რომ საჭიროების შემთხვევაში დაიხუროს.
როგორც საგარეო საქმეთა მინისტრმა მარგუს ცაჰკნამ აღნიშნა, ესტონეთი მუდმივ კავშირშია ფინეთთან და საჭიროების შემთხვევაში მზადაა დაეხმაროს მას, რადგან ეს რეგიონალური პრობლემაა და ფინეთი მარტო არ უნდა დარჩეს ამ პრობლემასთან.
ამავდროულად, შინაგან საქმეთა მინისტრის ლაური ლიანემეცის განცხადებით, ამ დროისთვის ესტონეთის საზღვარზე ვითარება სრული კონტროლის ქვეშაა და საზღვრებს გამოკვეთილი მიზეზის გარეშე არავინ დაკეტავს.
„ესტონეთი არ არის ისეთი სუსტი, რომ ჩვენს საზღვარზე რამდენიმე ათეულ მიგრანტთან გამკლავება ვერ შევძლოთ. თუ ახლა საზღვრებს დავხურავთ, ეს არაპროპორციული ზომა იქნება და ამით ჩვენს სისუსტეს ვაჩვენებთ მტერს, თავდაუჯერებლობას დავანახებთ ჩვენს პარტნიორებს. გარდა ამისა, ჩვენ შეიძლება საზოგადოებაში შიში ჩავნერგოთ, რაც არის რუსების ერთ-ერთი მიზანი ამ ჰიბრიდული შეტევის განხორციელებისას“, - აღნიშნა ლაური ლიანემეცმა.
როგორც ცნობილია, ფინეთმა მიგრანტების მზარდი ნაკადის გამო ერთის გარდა ყველა სასაზღვრო-გამშვები პუნქტი დახურა.
