გაერო-ს შეფასებით, უკრაინის წინააღმდეგ რუსეთის სრულმასშტაბიანი ომის შედეგად, უკვე 10 ათასზე მეტი მშვიდობიანი მოქალაქე დაიღუპა. მათგან დაახლოებით ნახევარი დაღუპულია საბრძოლო ტერიტორიების გარეთ. ამის შესახებ განაცხადა გაერო-ს ადამიანის უფლებათა უმაღლესი კომისრის ოფისმა.
ომის დაწყებისთანავე, მარიუპოლისთვის სასტიკი ბრძოლების დროს, მშვიდობიანი მოსახლეობის დიდი ნაწილი დაიღუპა.
გაერო-ს სადამკვირვებლო მისიის ხელმძღვანელის, დანიელ ბელის ცნობით, დაღუპული მშვიდობიანი მოქალაქეების დიდი რაოდენობა უკრაინის ქალაქების წინააღმდეგ რუსული ავიაციის იერიშებს ემსხვერპლა.
გაერო-მ უკრაინაში ათობით თანამშრომელი გაგზავნა რუსული აგრესიის მსხვერპლთა შესახებ მონაცემების შესაგროვებლად.
როგორც ორგანიზაციაში აღნიშნავენ, უკრაინაში დაღუპულთა რეალური რიცხვი, სავარაუდოდ, გაცილებით მეტია. გაერო ომის დროს დაღუპულთა შესახებ მხოლოდ დოკუმენტურად დადასტურებულ მონაცემებს აქვეყნებს.
