აშშ-ის სახელმწიფო მდივანი ენტონი ბლინკენი ისრაელში ვიზიტის შემდეგ იორდანიაში იმყოფებოდა, სადაც იორდანიის საგარეო საქნეთა მინისტრს, აიმან საფადის და ეგვიპტის საგარეო საქმეთა მინისტრს სამეჰ შუქრის შეხვდა.
ენტონი ბლინკენის განცხადებით, ისრაელზე „ჰამასის“ თავდასხმის შემდეგ იმ მდგომარეობასთან დაბრუნება, რომელიც 7 ოტომბრამდე იყო, შეუძლებელია.
სახელმწიფო მდივნის თქმით, შეერთებული შტატები ისრაელთან ერთად პალესტინის სახელმწიფოს შექმნის იდეის ერთგული რჩება, მაგრამ „ჩვენ ყველას გვესმის, რომ სტატუს კვოს ვერ დავუბრუნდებით“, - აღნიშნა მან ერთობლივ პრესკონფერენციაზე.
ბლინკენმა ხაზგასმით აღნიშნა, რომ შეერთებული შტატები აღიარებს ისრაელის უფლებას „ჰამასისგან“ თავი დაიცვას, მაგრამ „მან უნდა მიიღოს ყველა შესაძლო ზომა მშვიდობიან მოქალაქეებს შორის მსხვერპლის თავიდან ასაცილებლად“.
მან თქვა, რომ ისრაელის ხელისუფლებასთან განიხილა სამხედრო ოპერაციებში „ჰუმანიტარული პაუზების“ შესაძლებლობა მშვიდობიანი მოსახლეობის დასახმარებლად. თუმცა, ამასთან ბლინკენიკვლავ ცეცხლის სრული შეწყვეტის წინააღმდეგია.
„ცეცხლის შეწყვეტა ახლა „ჰამასს“ უბრალოდ დროს მისცემს, რომ გადაჯგუფდეს და გაიმეოროს ის, რაც ჩაიდინა 7 ოქტომბერს. სულ რამდენიმე დღის წინ „ჰამასის“ მაღალჩინოსანმა განაცხადა, რომ აპირებენ 7 ოქტომბრის მოვლენების ისევ და ისევ გამეორებას. ვერც ერთი ქვეყანა ვერ დაუშვებს ამას“, - განაცხადა აშშ-ს სახელმწიფო მდივანმა.
თავის მხრივ, იორდანიის საგარეო საქმეთა მინისტრმა აიმან საფადიმ პრესკონფერენციაზე განაცხადა, რომ „მთელი რეგიონი იძირება სიძულვილის მორევში და ეს გავლენას მოახდენს მომავალ თაობებზე“.
„ჩვენ უკვე ვხედავთ რეგიონში სიძულვილზე დაფუძნებულ სხვადასხვა გამოვლინებასა და ქმედებებს, გულწრფელად რომ ვთქვათ, ისლამოფობიისა და ანტისემიტიზმის ამაზრზენ ქმედებებს. ჩვენ ყველანი ცალსახად ამის წინააღმდეგი ვართ - ეს არის ჩვენი პრინციპული პოზიცია ადამიანური ღირებულებების შესაბამისად“, - განაცხადა მინისტრმა.
მისი თქმით, ეს არ არის რელიგიური ომი. ეს არ არის ომი მუსლიმებსა და ებრაელებს შორის.
ეგვიპტის საგარეო საქმეთა მინისტრმა სამეჰ შუქრიმ განაცხადა, რომ იგი ბლინკენთან მოლაპარაკებების დროს "ორმაგი სტანდარტების გამოყენების" წინააღმდეგ გამოვიდა.
შუქრის თქმით, სამოქალაქო პირებზე თავდასხმები და საერთაშორისო ჰუმანიტარული სამართლის დარღვევა დაგმობილი უნდა იყოს.
„არაბული სისხლი სხვა ხალხების სისხლზე ნაკლები არ არის, - აღნიშნა მან.
ეგვიპტის საგარეო საქმეთა მინისტრმა ასევე მოუწოდ,ა ღაზაში სასწრაფო და ყოვლისმომცველი ცეცხლის შეწყვეტისკენ ყოველგვარი წინაპირობის გარეშე.
