ღაზის სექტორში ჰუმანიტარული დახმარების ყველაზე დიდი კოლონა - 33 სატვირთო მანქანა - შევიდა, მას შემდეგ, რაც რეგიონში დახმარების მიწოდება განახლდა.
გაეროს ჰუმანიტარულ საკითხთა კოორდინაციის ოფისის ცნობით, ეგვიპტესთან რაფაჰის სასაზღვრო პუნქტი 33 სატვირთო მანქანამ გადაკვეთა და ღაზის სექტორის მოსახლეობას საკვები, წყალი და მედიკამენტები ჩაუტანა.
21 ოქტომბერს მიწოდების განახლების შემდეგ რაფაჰის გავლით ღაზაში სულ 117 სატვირთო მანქანა შევიდა. როგორც გაერო აცხადებს, ეს ძალიან ცოტაა: ღაზას გაცილებით დიდი რაოდენობით სასწრაფოდ სჭირდება საკვები, მედიკამენტები და საწვავი საავადმყოფოებისთვის.
7 ოქტომბერს ჰამასის თავდასხმის შემდეგ ისრაელმა ღაზას სექტორი ბლოკადაში მოაქცია და ელექტროენერგიის, საკვებისა და წყლის მიწოდება შეუწყვიტა. ამ მოვლენებამდე ყოველდღიურად ღაზაში 500-მდე სატვირთო მანქანა შედიოდა ჰუმანიტარული დახმარებისა და კომერციული ტვირთის სახით.
სააგენტო AFP, აშშ-ის ანონიმ წყაროზე დაყრდნობით იუწყება, რომ ისრაელმა, რომელიც აკონტროლებს ტვირთების გადაზიდვას ღაზაში, მათ შორის ეგვიპტის მხრიდანაც, პირობა დადო, რომ ყოველდღიურად ღაზაში ჰუმანიტარულ დახმარების 100 სატვირთო მანქანას შეუშვებს, რაც გაეროს წარმოპმადგენელთა აზრით, უზრუნველყოფს ღაზის სექტორის მოსახლეობის მხოლოდ ყველაზე მინიმალურ საჭიროებებს.
