ღაზას სექტორში ათასობით პალესტინელი შეიჭრა დეირ ელ ბალის სიდიდით მეორე ჰუმანიტარული დახმარების ცენტრში, სადაც გაერო-ს გაგზავნილი ტვირთის განაწილება ხდება. გაერო-ს პალესტინელი ლოტლვილების საქმეთა სააგენტოს განცხადებით, ცენტრში შეჭრა დღისით მოხდა. იუწყება BBC
დატაცებულ პროდუქციას შორის არის ხორბლის ფქვილი და სხვა სურსათი ასევე ჰიგიენის საშუალებები, თუმცა სააგენტო ხაზგასმით აღნიშნავს, რომ ცენრიდან საწვავი არ წაუღიათ.
გაერო-ს მსოფლიო სასურსათო პროგრამის წარმომადგენლის აბირ ეტეფას განცხადებით, ღაზაში ჰუმანიტარული დახმარების ცენტრებზე თავდასხმა მოსალოდნელი იყო, რადგან ადამიანები უმძიმეს პირობებში იმყოფებიან.
როგორც მან BBC-ის განუცხადა, ინტერნეტსა და სატელეფონო სერვისებზე წვდომის შეფერხებამ სავარაუდოდ ხელი შეუწყო საწყობებისა და გამანაწილებელი ცენტრების ძარცვას. მისი თქმით, გაერო იძულებული გახდა საკვები პროდუქტების გაცემა შეეჩერებინა, რადგან ადგილებზე მყოფ ჯგუფებთან კომუნიკაციას ვერ ახერხებდა.
„დღეს ჩვენ განვაახლებთ მუშაობას, რადგან კომუნიკაცია ეტაპობრივად აღდგება“, - განაცხადა მან.
ამ დროისათვის ღაზაში ჰუმანიტარული ტვირთით 80 სატვირთო მანქანა შევიდა.
ისრაელმა უარი თქვა ღაზაში საწვავის მიწოდებაზე, რადგან მიაჩნია, რომ „ჰამასი“ მას სამხედრო მიზნებისთვის იყენებს - განსაკუთრებით დიზელის გენერატორებისთვის, რომლებიც უზრუნველყოფენ განათებას და ვენტილაციას ღაზას სექტორის ქვეშ გათხრილი გვირაბების ქსელში.
