ისრაელი დაუყოვნებლივ გამოიყენებს მთელ თავის ძალას „ჰამასის“ პოტენციალის გასანადგურებლად, - ამის შესახებ ისრაელის პრემიერ-მინისტრმა, ბენიამინ ნეთანიაჰუმ განაცხადა.
„ის, რაც დღეს მოხდა, არასდროს მინახავს ისრაელში. მე ვიზრუნებ, რომ ეს აღარასოდეს განმეორდეს. ისრაელი დაუყოვნებლივ გამოიყენებს მთელ თავის ძალას „ჰამასის“ შესაძლებლობების გასანადგურებლად”,- განაცხადა ნეთანიაჰუმ.
მისი თქმით, „ჰამასმა“ დაიწყო სასტიკი და ბოროტი ომი, რომლის სამიზნე იყვნენ ახალგაზრდები, მოხუცები, უდანაშაულო მშვიდობიანი მოქალაქეები.
„ჩვენ სამიზნე იქნება „ჰამასი“ ყველგან, სადაც ის იმოქმედებს... ჩვენ მოვიგებთ ამ ომს, მაგრამ ფასი ძალიან ძვირი იქნება”,– განაცხადა ნეთანიაჰუმ.
ისრაელის პრემიერ-მინისტრმა მოუწოდა ღაზას მცხოვრებლებს დატოვონ ტერიტორია.
„ახლავე წადით, რადგან ჩვენ ვიმოქმედებთ ყველგან მთელი ძალით“,- განაცხადა ნეთანიაჰუმ. მან გააფრთხილა „ჰამასი,“ რომ ისრაელი პასუხისმგებლობას დააკისრებს მძევლებზე, რომლებიც აიყვანა.
ამასთან, ისრაელის პრემიერ-მინისტრმა მადლობა გადაუხადა აშშ-ის პრეზიდენტ ჯო ბაიდენს უპირობო მხარდაჭერისთვის.
