ისრაელის არმიამ განაცხადა, რომ სამხრეთით, დასახლებული პუნქტების უმეტესობაზე კონტროლი აღადგინა.
თავდაცვის სამინისტროში აცხადებენ, რომ არმიამ დაიბრუნა კონტროლი ღაზას სექტორის საზღვრის გასწვრივ მდებარე ქალაქების უმეტესობაზე, სადაც შეაღწიეს „ჰამასის“ და ისლამური ჯიჰადის მებრძოლებმა.
ამასთან, თავდაცვის სამინისტროს განცხადებით, ისრაელის მთელ ტერიტორიაზე საგანგებო მდგომარეობა გამოცხადდა.
„ისრაელის თავდაცვის მინისტრმა, იოავ გალანტმა გადაწყვიტა საგანგებო მდგომარეობის ამოქმედება ისრაელის მთელ ტერიტორიაზე”,- ნათქვამია გალანტის ოფისის განცხადებაში.
მანამდე, გალანტმა საგანგებო მდგომარეობა გამოაცხადა ღაზას სექტორიდან 80 კილომეტრის რადიუსში, თუმცა ახლა საგანგებო მდგომარეობა მთელი ისრაელის მასშტაბით გამოცხადდა.
