Al Jazeera ღაზას წყაროებზე დაყრდნობით იუწყება, რომ ტერორისტული დაჯგუფება „ჰამასის“ თავდასხმის შემდეგ ისრაელის არმიის საპასუხო დარტყმების შედეგად ღაზაში სულ მცირე 198 პალესტინელი დაიღუპა. დაშავებულთა რაოდენობა კი ათასამდეა.
ისრაელის ავიაციამ ღაზას სექტორში სამიზნეებზე იერიში „ჰამასის“ სარაკეტო თავდასხმის შემდეგ დაიწყო. ოპერაციაში ათობით თვითმფრინავი მონაწილეობს.
Al Jazeera-ს ინფორმაციით, ღაზაში, განსაკუთრებით კი ისრაელთან მოსაზღვრე რაიონებში, ადგილობრივები საცხოვრებელ სახლებს ტოვებენ და საზღვრდან მოშორებით, უსაფრთხო ტერიტორიებისკენ გადაადგილდებიან.
„ჰამასის“ თავდასხმის შედეგად, ისრაელში, სულ მცირე, 40 ადამიანი დაიღუპა და 740 დაშავდა. ღაზას სექტორიდან ისრაელის სარაკეტო თავდასხმა დღეს, გამთენიისას მოხდა.
ამასთან, ისრაელის თავდაცვის ძალები იუწყებიან, რომ პალესტინელმა მებრძოლებმა ღაზას სექტორიდან ისრაელის ტერიტორიაზე შეაღწიეს და საზღვართან რამდენიმე დასახლებაში შევიდნენ. მათივე ინფორმაციით, მებრძოლები ისარელის ტერიტორიაზე ხმელეთით, ზღვით და საჰაერო გზით პარაპლანების გამოყენებით მოხვდნენ.
ისრაელის ტერიტორიაზე ისრაელის ჯარისკაცებსა და პალესტინელებს შორის შეტაკებები მიმდინარეობს. საფრთხეში არიან ადგილობრივი მცხოვრებლები და ტურისტები. ვრცელდება ცნობები, რომ პალესტინელები შეიჭრნენ ადგილობრივების საცხოვრებელ სახლებში, ხოლო თავად მოსახლეობამ თავი სავარაუდოდ, თავშესაფრებსა და სხვა დაცულ ადგილებს შეაფარა.
