გამოცემა Washington Post-ის ჟურნალისტები, რომლებიც ხარკოვის ოლქის სოფელ გროზაში რუსეთის სარაკეტო დარტყმის ადგილზე იმყოფებოდნენ, აცხადებენ, რომ თითქმის ყველა დაღუპული მშვიდობიანი მოქალაქე იყო.
როგორც გამოცემის კორესპონდენტი წერს, დაღუპულთა შორის, სამხედრო ფორმა მხოლოდ ერთ ადამიანს ეცვა.
„პროზექტურის თანამშრომლები ამბობენ, რომ არ უნახავთ რაიმე მტკიცებულება, რომ მოკლულებს შორის სამხედრო მოსამსახურეები ყოფილიყვნენ, მსხვერპლთა უმეტესობა ასაკოვანია“, - ნათქვამია პუბლიკაციაში.
ჟურნალისტების თქმით, ხშირ შემთხვევაში ცხედრების იდენტიფიცირება შეუძლებელია, რადგან ისინი ძლიერ არიან დაზიანებული.
ჟურნალისტები წერენ, რომ ხარკოვის პროზექტურა მასობრივი მკვლელობის ადგილს ჰგავდა.
სოფელ გროზას დაბომბვის შედეგად განადგურდა კაფე, სადაც ადგილობრივები ომში დაღუპული უკრაინელი სამხედროს ხსოვნისადმი მიძღვნილ ღონისძიებაზე იყვნენ შეკრებილი.
კაფეში 60-მდე ადამიანი იმყოფებოდა, დაღუპულია სულ მცირე 52. მათ შორის ექვსი წლის ბავშვი.
გაეროს ადამიანის უფლებათა უმაღლესი კომისრის ოფისმა განაცხადა, რომ სოფელ გროზაში სპეციალურ ჯგუფს აგზავნის.
რუსეთის პრეზიდენტის სპიკერმა დმიტრი პესკოვმა ჟურნალისტებთნ კომენტარი გააკეთა სოფელ გროზას დაბომბვის შესახებ და თქვა, რომ რუსეთის არმია თავს არ ესხმის სამოქალაქო ობიექტებს. „დარტყმები ხორციელდება სამხედრო ინფრასტრუქტურის ობიექტებზე, ადგილებზე, სადაც იკრიბებიან სამხედრო მოსამსახურეები და სამხედრო ხელმძღვანელობის წარმომადგენლები“, - განაცხადა პესკოვმა.
ფოტო: Reuters - კაფე სოფელ გროზაში, რომელიც რუსეთის დაბომბვის შემდეგ ასე გამოიყურება
